“व्यवसाय प्रमाणपत्र काढण्याचे आदेश”
परभणी | प्रतिनिधी :
परभणी शहर महानगरपालिकेच्या वतीने शहरातील विनापरवाना व्यवसाय चालविणाऱ्या व्यावसायिकांवर कारवाईसंदर्भात महत्त्वपूर्ण पावले उचलण्यात आली असून, सर्व संबंधित दुकानदारांना व्यवसाय प्रमाणपत्र घेण्याबाबत सूचना देण्यात आल्या आहेत. आयुक्त नितीन नार्वेकर यांच्या आदेशानुसार मुख्य स्वच्छता निरीक्षकांना आवश्यक निर्देश देण्यात आले आहेत.
मंगळवार, दि. १६ जून रोजी आयुक्त नितीन नार्वेकर यांच्या दालनात प्रभाग समिती ‘अ’, ‘ब’ आणि ‘क’ अंतर्गत बैठक आयोजित करण्यात आली. या बैठकीत शहरातील ऑनलाइन व्यापार व विविध व्यवसाय करणाऱ्या दुकानदारांना व्यवसाय प्रमाणपत्र ऑनलाइन पद्धतीने काढण्याच्या सूचना देण्यात आल्या.
बैठकीस उपआयुक्त तुकाराम कदम, उपआयुक्त प्रशांत कांबळे, मालमत्ता व्यवस्थापक भगवान यादव, मुख्य व्यवस्थापक करण गायकवाड, मुख्य स्वच्छता निरीक्षक विकास रत्नपारखे, संगणक विभाग प्रमुख अदनान कादरी, स्वच्छता निरीक्षक लक्ष्मण जोगदंड, कुणाल भारसाकळे, शेख शादाब, प्रल्हाद देशमाने, सौरभ जोगदंड आदी उपस्थित होते.
शहरातील सर्व व्यावसायिकांनी व्यवसाय प्रमाणपत्रासाठी ऑनलाइन अर्ज करावा, असे आवाहन महानगरपालिकेने केले आहे. यासाठी संबंधित दुकानदारांनी महानगरपालिकेच्या संकेतस्थळावर जाऊन ऑनलाइन नोंदणी करून आवश्यक कागदपत्रे जोडावीत, असे निर्देश देण्यात आले आहेत.
ऑनलाइन अर्ज प्राप्त झाल्यानंतर संबंधित दुकानाची पाहणी करून व्यवसाय प्रमाणपत्र देण्याचे आदेश आयुक्तांनी मुख्य स्वच्छता निरीक्षक व स्वच्छता निरीक्षकांना दिले आहेत.
तसेच, ज्या व्यवसाय धारकांनी अद्याप ऑनलाइन अर्ज केलेला नाही, त्यांच्यावर कायदेशीर कारवाई करण्यात येणार असल्याचे स्पष्ट करण्यात आले आहे. शहरातील सर्व व्यवसायिकांनी महानगरपालिकेच्या अधिकाऱ्यांना आवश्यक माहिती व सहकार्य करावे, असे आवाहन आयुक्त नितीन नार्वेकर यांनी केले आहे.
