मुलचेरा | प्रतिनिधी : मुलचेरा तालुक्यात अधिकृत स्टॅम्प विक्रेता उपलब्ध नसल्यामुळे नागरिकांना विविध शासकीय व कायदेशीर कामांसाठी आवश्यक स्टॅम्प खरेदी करताना मोठ्या अडचणींचा सामना करावा लागत आहे. यामुळे सर्वसामान्य नागरिक, शेतकरी, विद्यार्थी आणि व्यावसायिकांची मोठी गैरसोय होत असून वेळ आणि पैशांचा अतिरिक्त भार सहन करावा लागत आहे.
तालुक्यात अधिकृत स्टॅम्प विक्रेता नसल्याने नागरिकांना स्टॅम्प खरेदीसाठी चामोर्शी, अहेरी, गडचिरोली, गोंडपिपरी आदी ठिकाणी जावे लागत आहे. त्यामुळे प्रवास खर्च वाढत असून महत्त्वाची कामे वेळेत पूर्ण करण्यात अडचणी निर्माण होत आहेत. विशेषतः जमीन व्यवहार, प्रतिज्ञापत्रे, शासकीय कागदपत्रे आणि विविध करारनाम्यांसाठी नागरिकांना मोठा त्रास सहन करावा लागत आहे.
या समस्येची दखल घेत अखिल भारतीय आदिवासी विकास परिषदेच्या पदाधिकाऱ्यांनी जिल्हाधिकारी, गडचिरोली यांना निवेदन सादर केले. निवेदनात मुलचेरा तालुक्यात तातडीने अधिकृत स्टॅम्प विक्रेत्याची नियुक्ती करावी किंवा पर्यायी व्यवस्था उपलब्ध करून नागरिकांची गैरसोय दूर करावी, अशी मागणी करण्यात आली आहे.
यावेळी युवा जिल्हाध्यक्ष कुणाल कोवे, युवा तालुकाध्यक्ष कालिदास कुसनाके, उपाध्यक्ष संदीप तोरे, संघटक महेंद्र आत्राम, सोशल मीडिया प्रमुख केजीकराव आरके, सहसचिव राकेश मरापे, कार्याध्यक्ष काशिनाथ मडावी, चामोर्शी तालुका अध्यक्ष सुमित कुंभरे, ॲड. गिरीश झोरे यांच्यासह नागरिक उपस्थित होते.
प्रशासनाने नागरिकांच्या मागणीची दखल घेऊन लवकरात लवकर आवश्यक कार्यवाही करावी, अशी अपेक्षा व्यक्त करण्यात येत आहे.
