सेलू | जि. परभणी | प्रतिनिधी :
सेलू तालुक्यातील अनेक स्वस्त धान्य दुकानांमध्ये शासनाच्या नियमांचे उल्लंघन होत असल्याची तक्रार नागरिकांकडून करण्यात येत आहे. शासनाच्या नियमानुसार रेशन दुकानांवर धान्याचे दर, उपलब्ध साठा, वितरणाची माहिती तसेच लाभार्थ्यांसाठी आवश्यक सूचना फलकावर स्पष्टपणे प्रदर्शित करणे बंधनकारक आहे. मात्र अनेक ठिकाणी ही माहिती फलकावर दिसत नसल्याचे समोर आले आहे.
माहिती फलक नसल्यामुळे लाभार्थ्यांना धान्याचे अधिकृत दर, उपलब्ध साठा आणि वितरणासंदर्भातील माहिती मिळत नाही. त्यामुळे पारदर्शकतेचा अभाव निर्माण होत असून नागरिकांमध्ये नाराजी व्यक्त केली जात आहे.
संबंधित पुरवठा विभागाने या प्रकरणाची तातडीने दखल घेऊन सर्व रेशन दुकानदारांना नियमांचे काटेकोर पालन करण्याच्या सूचना द्याव्यात, तसेच नियमांचे उल्लंघन करणाऱ्यांवर कारवाई करावी, अशी मागणी नागरिकांकडून होत आहे.
“माहिती फलक हा लाभार्थ्यांचा हक्क आहे, तो प्रत्येक रेशन दुकानात दिसलाच पाहिजे,” अशी भावना नागरिकांनी व्यक्त केली.
