शिरूर | प्रतिनिधी : अधिक मास, गुरुवार आणि एकादशी असा पवित्र योग जुळून आल्याच्या निमित्ताने शिरूर शहरातील प्रभाग क्रमांक ४ मधील महिलांसाठी अक्कलकोट येथे श्री स्वामी समर्थ महाराजांच्या दर्शनाची विशेष यात्रा आयोजित करण्यात आली. नगरसेविका डॉ. सुनिताताई पोटे यांच्या पुढाकारातून राही प्रतिष्ठान आणि आत्मनिर्भर सोशल फाउंडेशन यांच्या संयुक्त विद्यमाने हा उपक्रम राबविण्यात आला.
अधिक मासाला धार्मिक दृष्ट्या विशेष महत्त्व असल्याने या दर्शन यात्रेला महिलांचा उत्स्फूर्त प्रतिसाद मिळाला. अक्कलकोट येथे श्री स्वामी समर्थ महाराजांचे दर्शन घेतल्यानंतर महिलांनी कुटुंबाच्या सुख-समृद्धी, आरोग्य आणि मंगलमय भविष्यासाठी प्रार्थना केली.
या धार्मिक सहलीमुळे महिलांना अध्यात्मिक समाधान मिळाले असून सामाजिक व सांस्कृतिक एकात्मता अधिक दृढ झाल्याची भावना सहभागी महिलांनी व्यक्त केली. या उपक्रमाबद्दल महिलांनी डॉ. सुनिताताई पोटे, राही प्रतिष्ठान आणि आत्मनिर्भर सोशल फाउंडेशन यांचे आभार मानले.
समाजातील महिलांना धार्मिक आणि सामाजिक उपक्रमांच्या माध्यमातून एकत्र आणण्याचा हा उपक्रम प्रेरणादायी ठरत असल्याचे मत यावेळी व्यक्त करण्यात आले.
