महाबळेश्वर प्रतिनिधी : दि. १४ जून रोजी सारथी महाराष्ट्राचा न्यूज माध्यमातून प्रसिद्ध करण्यात आलेल्या बातमीची दखल घेत पाचगणी पोलीस स्टेशनचे सहाय्यक पोलीस निरीक्षक दिलीप पवार यांनी हॉटेल व विला मालकांची बैठक आयोजित केली.
बैठकीत हॉटेल व्यवसायिकांनी पर्यटकांच्या सुरक्षेला प्राधान्य द्यावे तसेच परिसरातील नागरिकांना कोणताही त्रास होणार नाही याची काळजी घ्यावी, असे आवाहन करण्यात आले. याशिवाय हॉटेल व विला चालकांनी आपल्या कर्मचाऱ्यांची संपूर्ण माहिती नोंदवून ठेवणे, येणाऱ्या प्रत्येक पर्यटकाची नोंद करणे, वैध ओळखपत्र तपासणे आणि आवश्यक माहिती रजिस्टरमध्ये नमूद करणे बंधनकारक असल्याचे सांगण्यात आले.
या बैठकीस उपनिरीक्षक बालाजी साहेब तसेच पोलीस कर्मचारी उपस्थित होते. पाचगणीची सुरक्षित पर्यटनस्थळ म्हणून असलेली ओळख कायम राखण्यासाठी पोलीस प्रशासनाला सहकार्य करावे, असे आवाहनही दिलीप पवार यांनी केले.
यावेळी सोनुने यांनी नियमावलीचे वाचन करून हॉटेल व्यवसायिकांना आवश्यक सूचना दिल्या. तसेच कोणत्याही आपत्कालीन परिस्थितीत नागरिकांनी व व्यावसायिकांनी तात्काळ 112 हेल्पलाइन क्रमांकावर संपर्क साधावा, असेही आवाहन करण्यात आले.
