माळशिरस प्रतिनिधी :
माळशिरस : सोलापूर विधान परिषद निवडणुकीच्या पार्श्वभूमीवर वेळापूर येथील गरुड बंगला येथे महत्त्वपूर्ण राजकीय बैठक पार पडली. महाराष्ट्र राज्याचे ग्रामविकास व पंचायत राज मंत्री तथा सोलापूर जिल्ह्याचे पालकमंत्री जयकुमार गोरे यांनी सदिच्छा भेट देत आगामी निवडणुकीसंदर्भात चर्चा केली.
यावेळी महायुती व मित्रपक्षांचे अधिकृत उमेदवार राजेंद्र राऊत यांना पाठिंबा देण्याबाबत सकारात्मक चर्चा करण्यात आली. आगामी विधान परिषद निवडणुकीच्या अनुषंगाने आवश्यक राजकीय समीकरणे, संघटनात्मक बांधणी तसेच निवडणूक रणनीतीवर सविस्तर विचारविनिमय करण्यात आला. विजयासाठी सर्व घटकांनी एकजुटीने काम करण्याची गरजही यावेळी अधोरेखित करण्यात आली.
बैठकीस माळशिरस व नातेपुते नगरपरिषदेचे नगराध्यक्ष, नगरसेवक, जिल्हा परिषद सदस्य, नगरपंचायत पदाधिकारी, तालुक्यातील विविध गावांचे सरपंच, उपसरपंच तसेच अनेक मान्यवर पदाधिकारी व कार्यकर्ते मोठ्या संख्येने उपस्थित होते.
