नाशिक प्रतिनिधी
नाशिक येथील स्ट्रॉबेरी स्कूलमध्ये शैक्षणिक वर्ष 2026-27 ची उत्साहपूर्ण सुरुवात करण्यात आली. 11 जून रोजी शाळा थाटामाटात सुरू झाली असून विद्यार्थ्यांचे टाळ्यांच्या गजरात स्वागत करण्यात आले.
शाळेच्या प्राचार्या रंजना खटी यांनी विद्यार्थी व पालकांना मार्गदर्शन करत नव्या शैक्षणिक वर्षाच्या शुभेच्छा दिल्या. “नवीन वर्ष म्हणजे नवीन संधी. शिस्त, अभ्यास आणि संस्कार यांचा समतोल साधून प्रत्येक विद्यार्थ्याने आपले ध्येय गाठावे. मोबाईलपेक्षा पुस्तकाशी मैत्री करा आणि शिक्षकांचा आदर करा,” असे त्या म्हणाल्या.
शाळा सुरू होण्याच्या कार्यक्रमाला सर्व शिक्षक व शिक्षकेतर कर्मचारी उपस्थित होते. नवीन विद्यार्थ्यांचे वर्गशिक्षकांनी टिळा लावून व फुले देऊन स्वागत केले. पहिल्याच दिवशी “ओळख परिचय” तसेच “वर्षाचा आराखडा” यावर वर्गात चर्चा करण्यात आली.
दोन महिन्यांच्या सुट्टीनंतर शाळा सुरू झाल्याने विद्यार्थ्यांच्या चेहऱ्यावर आनंद दिसून येत होता. शाळा परिसर रांगोळी आणि फुग्यांनी आकर्षक सजवण्यात आला होता. कार्यक्रमाची सांगता राष्ट्रगीताने करण्यात आली.
