नाशिक प्रतिनिधी :
तपोवन परिसरातील केवडीबन येथील कृषी गौ सेवा ट्रस्ट गोशाळेसमोर मंगळवारी सकाळी एका सुटकेसमध्ये गोणीत भरलेला महिलेचा मृतदेह आढळून आल्याने परिसरात मोठी खळबळ उडाली आहे. प्राथमिक तपासात संबंधित महिलेची गळा आवळून हत्या करण्यात आल्याचे समोर आले असून पोलिसांनी घटनेचा तपास सुरू केला आहे.
तपोवन परिसरात काम करणाऱ्या एका खासगी कंपनीच्या कर्मचाऱ्यांना परिसरातून तीव्र दुर्गंधी येत असल्याचा संशय आला. त्यांनी परिसरात शोध घेतला असता एक संशयास्पद सुटकेस आढळून आली. सुटकेस उघडून पाहिल्यानंतर त्यामध्ये गोणीत भरलेला महिलेचा मृतदेह असल्याचे दिसून आले. कर्मचाऱ्यांनी तत्काळ पोलिसांना माहिती दिली.
मृतदेह सडलेल्या अवस्थेत असल्याने तो अनेक दिवसांपूर्वी टाकण्यात आल्याचा अंदाज व्यक्त करण्यात येत आहे. नाशिकमध्ये सिंहस्थ कुंभमेळ्याच्या कामांमुळे पंचवटी आणि तपोवन परिसरात मोठ्या प्रमाणात मजुरांची वर्दळ असते. अशा गर्दीच्या परिसरात मृतदेह आढळल्याने नागरिकांमध्ये भीतीचे वातावरण निर्माण झाले आहे.
पोलिसांनी मृतदेह शवविच्छेदनासाठी जिल्हा शासकीय रुग्णालयात पाठवला. शवविच्छेदन अहवालात गळा आवळून हत्या झाल्याचे स्पष्ट झाले आहे. मात्र मृतदेह सडलेल्या अवस्थेत असल्याने महिलेची ओळख पटविण्यात अडचणी येत आहेत.
संशयित आरोपी कोणत्या मार्गाने आले असावेत याचा शोध घेण्यासाठी परिसरातील सीसीटीव्ही कॅमेऱ्यांची तपासणी सुरू असल्याची माहिती गुन्हे शाखा युनिट-१, नाशिक यांनी दिली.
