कुरुंदवाड | प्रतिनिधी :
कुरुंदवाड येथील नगरपालिकेच्या चौकात आज सकाळी १० वाजता आयएएस अधिकारी तुकाराम मुंढे यांच्या फोटोवर दुग्धाभिषेक करण्यात आला. माजी नगरसेवक राजू आवळे यांच्या पुढाकारातून या कार्यक्रमाचे आयोजन करण्यात आले होते. यावेळी मोठ्या संख्येने नागरिक उपस्थित होते.
यावेळी बोलताना राजू आवळे म्हणाले, “सनदी अधिकारी कसा असावा तर तुकाराम मुंढे यांच्यासारखा असावा. राज्याला आणि देशाला अशा प्रामाणिक, कर्तव्यदक्ष आणि शिस्तप्रिय अधिकाऱ्यांची गरज आहे. समाजात सर्वत्र भेसळयुक्त अन्नपदार्थांचा सुळसुळाट झाला असून त्याचा परिणाम नागरिकांच्या आरोग्यावर होत आहे. अशा परिस्थितीत कठोर कारवाई करणाऱ्या अधिकाऱ्यांचे स्वागत व्हायला हवे.”
तुकाराम मुंढे हे महाराष्ट्रातील अत्यंत शिस्तप्रिय, पारदर्शक आणि धडाकेबाज प्रशासकीय अधिकारी म्हणून ओळखले जातात. सध्या ते महाराष्ट्र राज्य अन्न व औषध प्रशासन (FDA) विभागाचे आयुक्त म्हणून कार्यरत आहेत. त्यांच्या २१ वर्षांच्या प्रशासकीय कारकिर्दीत ही त्यांची २५ वी बदली असल्याची माहिती यावेळी देण्यात आली.
FDA विभागाची सूत्रे हाती घेतल्यानंतर त्यांनी पुणे, धाराशिव आणि छत्रपती संभाजीनगरसह विविध भागांत भेसळयुक्त अन्नपदार्थ, निकृष्ट दर्जाचे तूप, खवा उत्पादक तसेच रसायनांच्या सहाय्याने फळे पिकवणाऱ्यांवर धडक कारवाई सुरू केली आहे. “ग्राहकांना सुरक्षित, दर्जेदार आणि रसायनमुक्त अन्न मिळणे हा त्यांचा मूलभूत अधिकार आहे,” असा स्पष्ट इशारा त्यांनी दिला असल्याचे वक्त्यांनी सांगितले.
कार्यक्रमादरम्यान उपस्थित मान्यवरांनी तुकाराम मुंढे यांच्या कार्यशैलीचे कौतुक केले. “सनदी अधिकारी कैसा हो, तुकाराम मुंढे जैसा हो” अशा घोषणांनी परिसर दुमदुमून गेला.
यावेळी दादासो पाटील (माजी उपनगराध्यक्ष), रमेश भुजुगडे, स्वातंत्र्यसैनिक श्रीपाद आलासे, अरुण आलासे, बबलू पवार, आंदोलन अंकुशचे प्रमुख धनाजी चूडमुंगे, सुनिल कुरुंदवाडे, वैशाली जुगळे, गोपाळ चव्हाण, संजय अनुसे, प्रमोद चव्हाण, राजेंद्र फल्ले, बाबासो गावडे, उमेश बागडी, रणजित आवळे, रणजित डांगे, आप्पासो बंडगर, स्वामी चौगुले, एन. डी. पाटील यांच्यासह अनेक नागरिक उपस्थित होते.
