जळकोट | प्रतिनिधी
जळकोट तालुक्यातील गुती येथील रहिवासी होमगार्ड जवान ज्ञानेश्वर प्रकाश केंद्रे यांचा २२ जानेवारी रोजी शासकीय कर्तव्य बजावत असताना झालेल्या वाहन अपघातात दुर्दैवी मृत्यू झाला होता. या घटनेमुळे केंद्रे कुटुंबावर दुःखाचा डोंगर कोसळला होता.
दरम्यान, शासन स्तरावर सातत्याने पाठपुरावा करून अखेर केंद्रे यांच्या कुटुंबाला शासनाकडून ५० लाख रुपयांची आर्थिक मदत मंजूर करण्यात आली आहे. या मदतीमुळे केंद्रे कुटुंबाला मोठा आधार मिळाला असून परिसरातून समाधान व्यक्त करण्यात येत आहे.
या प्रकरणात गृहरक्षक दलाच्या अधिकाऱ्यांनी महत्त्वाची भूमिका बजावली. विविध शासकीय कागदपत्रांची पूर्तता वेळेत पूर्ण करून मदत मिळवून देण्यासाठी गृहरक्षक दलाचे सहाय्यक संचालक विजयकुमार कलवले यांनी विशेष प्रयत्न केले. दुःखाच्या छायेत असलेल्या केंद्रे कुटुंबाला शासनाची मदत मिळवून देण्यात त्यांनी माणुसकीचा हात दिल्याची भावना नागरिकांनी व्यक्त केली.
ज्ञानेश्वर केंद्रे हे कर्तव्यदक्ष आणि प्रामाणिक जवान म्हणून ओळखले जात होते. त्यांच्या निधनानंतर गावात हळहळ व्यक्त करण्यात आली होती. शासनाकडून मिळालेल्या या आर्थिक मदतीमुळे कुटुंबाला काही प्रमाणात दिलासा मिळाला आहे.
