सावली बेघर निवारा केंद्रात ‘जागतिक ज्येष्ठ नागरिक छळ जागरूकता दिन’ साजरा

जनजागृती व आरोग्य तपासणी शिबिराचे आयोजन

परभणी | प्रतिनिधी :

परभणी शहर महानगरपालिकेच्या साखला प्लॉट येथील सावली बेघर निवारा केंद्रात “जागतिक ज्येष्ठ नागरिक छळ जागरूकता दिन” निमित्त ज्येष्ठ नागरिकांच्या कायदेशीर हक्क, संरक्षण, कल्याण, प्रतिष्ठा आणि न्यायप्राप्तीबाबत जनजागृती कार्यक्रमाचे आयोजन करण्यात आले.

या कार्यक्रमाला जिल्हा विधी सेवा प्राधिकरणाचे सचिव तथा न्यायाधीश भूषण काळे प्रमुख उपस्थित होते. तसेच परभणी महानगरपालिकेचे सहाय्यक आयुक्त गजानन जाधव, शहर व्यवस्थापक पठाण यखत्यारखान, DAY-NULM विभागाचे शेख महम्मद यांचीही प्रमुख उपस्थिती होती.

कार्यक्रमादरम्यान न्यायाधीश भूषण काळे यांनी निवारा केंद्रातील लाभार्थ्यांशी संवाद साधत त्यांच्या कायदेविषयक अडचणी, न्यायालयीन प्रकरणे आणि विविध समस्यांबाबत माहिती घेतली. ज्येष्ठ नागरिकांना मोफत कायदेशीर मदत उपलब्ध करून देण्याचे आश्वासन देत, कोणत्याही प्रकारच्या कायदेशीर अडचणींसाठी जिल्हा विधी सेवा प्राधिकरणामार्फत आवश्यक ती मदत केली जाईल, असे त्यांनी स्पष्ट केले.

यावेळी वैद्यकीय आरोग्य अधिकारी डॉ. कल्पना सावंत यांच्या मार्गदर्शनाखाली वैद्यकीय पथकाने निवारा केंद्रातील ज्येष्ठ नागरिकांची आरोग्य तपासणी केली. तपासणीनंतर आवश्यक औषधोपचार व औषधांचे वितरण करण्यात आले.

या उपक्रमाच्या यशस्वी आयोजनासाठी DAY-NULM टीम तसेच आरोग्य विभागातील अधिकारी व कर्मचाऱ्यांनी विशेष सहकार्य केले. कार्यक्रमास ॲड. पांडुरंग शिंदे, प्रीतेश तरोडेकर, जिल्हा विधी सेवा प्राधिकरणाची टीम तसेच सावली प्रतिष्ठानचे संचालक युवराज गव्हाणे उपस्थित होते.

ज्येष्ठ नागरिकांच्या हक्कांबाबत जागरूकता निर्माण करण्यासोबतच त्यांच्या आरोग्याची काळजी घेणारा हा उपक्रम लाभार्थ्यांसाठी अत्यंत उपयुक्त ठरल्याचे मत आयुक्त नितीन नार्वेकर यांनी व्यक्त केले.