बांबवडे प्रतिनिधी :
चिमुरडीच्या वाढदिवसाचे औचित्य साधत सामाजिक बांधिलकी जपणारा एक आगळावेगळा आणि प्रेरणादायी उपक्रम राबविण्यात आला आहे. ईश्वरी प्रदीप लोहार हिच्या वाढदिवसानिमित्त अंगणवाडी शाळेतील लहान बालकांसाठी वॉटर कुलर भेट देण्यात आला.
अनेक राज्य व राष्ट्रीय पुरस्कारांनी सन्मानित, सेवानिवृत्त केंद्रप्रमुख डॉ. श्री. रामचंद्र दादोबा लोहार (पिशवीकर) (M.A., B.Ed., D.Lit.) यांच्या वतीने हा कौतुकास्पद उपक्रम राबविण्यात आला. वाढदिवस साजरा करण्याची सामाजिक जाणीव जपत समाजासमोर एक आदर्श निर्माण करण्याचा प्रयत्न या माध्यमातून करण्यात आला आहे.
याप्रसंगी डॉ. रामचंद्र लोहार आणि लोहार परिवाराच्या हस्ते अंगणवाडी केंद्राला वॉटर कुलर सुपूर्द करण्यात आला. हा उपयुक्त उपहार अंगणवाडी सेविका व मदतनीस यांनी आनंदाने स्वीकारला.
वाढदिवसाच्या निमित्ताने होणारा अनावश्यक खर्च टाळून अंगणवाडीत शिक्षण घेणाऱ्या चिमुकल्यांच्या आरोग्याची काळजी घेत स्वच्छ आणि थंड पिण्याच्या पाण्याची सुविधा उपलब्ध व्हावी, या उदात्त हेतूने ही भेट देण्यात आली.
यावेळी उपस्थित बालकांनी आणि अंगणवाडी कर्मचाऱ्यांनी ईश्वरीला वाढदिवसाच्या शुभेच्छा दिल्या तसेच लोहार परिवाराच्या या संवेदनशील व समाजोपयोगी उपक्रमाचे मनापासून कौतुक केले.
