माजलगाव प्रतिनिधी :
पोलीस स्टेशन शिरसाळा येथे कार्यरत पोलीस अंमलदार विकास रामधन मुंडे (वय ३२) यांच्या फिर्यादीवरून अवैध गुटखा वाहतूक प्रकरणी एकाविरुद्ध गुन्हा दाखल करण्यात आला आहे. ही कारवाई २१ जून २०२६ रोजी सायंकाळी सुमारे ६.३० वाजण्याच्या दरम्यान मौजे खतगव्हाण, ता. माजलगाव, जि. बीड येथील दिग्रस ते खतगव्हाण रोडवर करण्यात आली.
मिळालेल्या माहितीनुसार, रणजीत मुठाळ यांच्या घरापासून सुमारे १०० मीटर अंतरावर उभी असलेल्या पांढऱ्या रंगाच्या होंडाई कंपनीच्या क्रेटा कार (क्र. MH48 AK 7555) ची तपासणी करण्यात आली. यावेळी महाराष्ट्र शासनाने विक्री व वाहतुकीस बंदी घातलेला गुटखा व सुगंधित तंबाखूचा साठा आढळून आला.
या कारवाईत आरोपी अभय दिनेश सोळंके (वय ३२, रा. मुंगी, ता. धारूर, जि. बीड) याच्या ताब्यातून खालील मुद्देमाल जप्त करण्यात आला :
- राजनिवास सुगंधित पान मसाला – ६०,००० रुपये
- प्रीमियम के एन-०१ जाफरानी जर्दा – ३८,४०० रुपये
- होंडाई क्रेटा कार – अंदाजे ८,५०,००० रुपये
- ओप्पो कंपनीचा मोबाईल – अंदाजे १५,००० रुपये
असा एकूण ९ लाख ६३ हजार ४०० रुपयांचा मुद्देमाल पोलिसांनी जप्त केला आहे.
फिर्यादीत नमूद केल्यानुसार, आरोपीने स्वतःच्या आर्थिक फायद्यासाठी शासनबंदी असलेला तसेच मानवी आरोग्यास अपायकारक असलेला गुटखा व सुगंधित तंबाखू वाहतूक केल्याचे निष्पन्न झाले आहे.
याप्रकरणी संबंधित कलमान्वये दखलपात्र गुन्हा दाखल करण्यात आला असून, मा. सहाय्यक पोलीस निरीक्षक राठोड यांच्या आदेशानुसार पुढील तपास पोलीस उपनिरीक्षक राठोड करीत आहेत.
