लोणी प्रतिनिधी :-
आंबेगाव तालुक्यातील वडगावपीर येथे श्री पिरसाहेब दर्ग्याच्या पाठीमागे असलेल्या सुमारे ६०० वर्षांहून अधिक जुन्या प्राचीन चिंचेच्या झाडाला वीज पडून आग लागल्याची घटना घडली. या घटनेमुळे परिसरातील ग्रामस्थांमध्ये चिंतेचे वातावरण निर्माण झाले होते.
रविवार दि. २१ जून रोजी सायंकाळी सुमारे सात वाजण्याच्या सुमारास झालेल्या वादळी पावसादरम्यान या प्राचीन चिंचेच्या झाडावर वीज कोसळली. त्यानंतर सोमवार दि. २२ जून रोजी पहाटे झाडाला आग लागल्याचे ग्रामस्थांच्या निदर्शनास आले. ही बाब लक्षात येताच फकीरा मुजावर यांनी माजी सरपंच संजय पोखरकर व जायदाबी मुजावर यांना तातडीने माहिती दिली.
घटनेची माहिती मिळताच त्यांनी भीमाशंकर सहकारी साखर कारखान्याचे संचालक तथा कार्यकारी संचालक चंद्रकांत ढगे यांच्याशी संपर्क साधला. त्यानंतर कारखान्याचे अध्यक्ष बाळासाहेब बेंडे व उपाध्यक्ष प्रदीप वळसे पाटील यांच्या मार्गदर्शनाखाली तातडीने पाण्याचा टँकर घटनास्थळी रवाना करण्यात आला.
कारखान्याच्या पाण्याच्या टँकरने दोन फेऱ्या करून झाडावरील आग आटोक्यात आणली. मात्र, आग लक्षात येण्यापूर्वीच चिंचेच्या झाडाच्या दोन मोठ्या फांद्या जळून खाली पडल्या होत्या. सुदैवाने आग वेळीच नियंत्रणात आल्याने मोठी दुर्घटना टळली.
या प्राचीन चिंचेच्या झाडाला आग लागल्याचे समजताच परिसरातील ग्रामस्थांनी श्री पिरसाहेब दर्गा परिसरात मोठी गर्दी केली व घटनास्थळी पाहणी केली. आग आटोक्यात आणण्यासाठी तत्परतेने मदत केल्याबद्दल नंदूभाई मुजावर, हनीफ मुजावर, फकीरा मुजावर तसेच ग्रामस्थांनी कारखान्याचे अध्यक्ष, उपाध्यक्ष व संचालकांचे आभार व्यक्त केले.
