प्रतिनिधी :-
कुरुंदवाड : मरहूम भूगंधर्व रहिमत खाँ आणि पं. विष्णूशास्त्री दिगंबर पलूसकर यांच्या स्मृतिप्रीत्यर्थ आयोजित करण्यात येणारा २९ वा संगीत महोत्सव बुधवार, दि. २४ जून रोजी उत्साहात संपन्न होणार आहे. मरहूम भूगंधर्व रहिमत खाँ व पं. विष्णूशास्त्री दिगंबर पलूसकर स्मृती समितीच्या वतीने या महोत्सवाचे आयोजन करण्यात आले आहे.
कुरुंदवाड संस्थानकालीन राजदरबारी गायक मरहूम भूगंधर्व रहिमत खाँ तसेच भारतीय शास्त्रीय संगीत क्षेत्रातील मान्यवर पं. विष्णूशास्त्री दिगंबर पलूसकर यांच्या स्मृती दिनानिमित्त गेल्या अनेक वर्षांपासून हा संगीत महोत्सव आयोजित केला जात आहे.
यंदाचा २९ वा संगीत महोत्सव बुधवार, दि. २४ जून रोजी सायंकाळी ६ वाजता येथील गणपती मंदिर सभागृहात आयोजित करण्यात आला आहे.
महोत्सवाच्या पहिल्या सत्रात स्थानिक कलाकारांना व्यासपीठ उपलब्ध करून देण्यात येणार असून, त्यांच्या स्वरांजलीतून भक्तीगीत, भावगीत, अभंग आणि नाट्यगीतांचा सुरेल कार्यक्रम सादर होणार आहे.
त्यानंतर दुसऱ्या सत्रात रात्री ९.३० वाजता कोल्हापूरचे सुप्रसिद्ध गायक रुद्रनाथ कुलकर्णी यांच्या सुश्राव्य गायनाचा कार्यक्रम होणार आहे. त्यांना तबल्यावर महेश देसाई (कोल्हापूर) तर संवादिनीवर स्वरूप दिवाण (कोल्हापूर) यांची साथसंगत लाभणार आहे.
संगीत महोत्सव समितीचे अध्यक्ष अरुण काका जोशी, उपाध्यक्ष डॉ. डी. पी. कुलकर्णी आणि दत्तात्रय कुलकर्णी यांनी ही माहिती दिली असून, कुरुंदवाड परिसरातील संगीतप्रेमी नागरिकांनी मोठ्या संख्येने उपस्थित राहून या कार्यक्रमाचा लाभ घ्यावा, असे आवाहन करण्यात आले आहे.
