प्रतिनिधी :-
कुरुंदवाड : येथील सच्चीदानंद आवटी हे अनेक वर्षांपासून आकाशवाणी सांगली केंद्रावर हिंदी दुभाषित निवेदक म्हणून कार्यरत असून, लिंगायत समाजातील सक्रिय कार्यकर्ते म्हणूनही परिचित आहेत. त्यांचे वडील कै. आप्पासाहेब बाबू आवटी यांच्या द्वितीय पुण्यस्मरणानिमित्त “काव्यांजली – बाप… आधार जीवनाचा!” या विशेष कवी संमेलनाचे आयोजन करण्यात आले आहे.
वडिलांविषयी असलेली कृतज्ञता आणि भावनिक नात्याला उजाळा देण्यासाठी हा आगळावेगळा उपक्रम राबविण्यात येत असून, वडिलांवर आधारित कवितांचे सादरीकरण या कार्यक्रमात होणार आहे.
या कवी संमेलनासाठी ख्यातनाम कवींना निमंत्रित करण्यात आले आहे. यात आबा पाटील, लता ऐवळे, दस्तगीर नदाफ तसेच कुरुंदवाडचे साहिल शेख सहभागी होणार आहेत.
हा कार्यक्रम बसवण्णा सामाजिक सेवा प्रतिष्ठान, कुरुंदवाड आणि शतक महोत्सव नगरवाचनालय, कुरुंदवाड यांच्या सौजन्याने आयोजित करण्यात आला आहे.
कवी संमेलन रविवार, दि. २८ जून २०२६ रोजी सायंकाळी ४.३० वाजता देशभक्त रत्नाप्पाण्णा कुंभार सभागृह, नगर वाचनालय, कुरुंदवाड येथे संपन्न होणार असून, साहित्यप्रेमींनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.
