२३ जून ‘जागतिक एकल महिला दिन’ उत्साहात साजरा
सेलू | प्रतिनिधी
महिला व बाल विकास विभाग, दीनदयाळ अंत्योदय योजना राष्ट्रीय नागरी उपजीविका अभियान आणि नगर परिषद सेलू यांच्या संयुक्त विद्यमाने राष्ट्रीय एकल महिला दिन उत्साहात साजरा करण्यात आला. महिलांच्या आर्थिक सक्षमीकरणासह रोजगार आणि शासकीय योजनांबाबत जनजागृती करण्याच्या उद्देशाने या कार्यक्रमाचे आयोजन करण्यात आले होते.
नगर परिषद मुख्याधिकारी तथा प्रशासक महेश गायकवाड यांच्या मार्गदर्शनाखाली हा कार्यक्रम पार पडला. कार्यक्रमाच्या अध्यक्षस्थानी नगर परिषदेच्या महिला व बालकल्याण समितीच्या सभापती शीला रामेश्वर काजळे या होत्या. सामाजिक कार्यकर्ते सुनील गायकवाड प्रमुख मार्गदर्शक म्हणून उपस्थित होते, तर विविध बँकांचे अधिकारी प्रमुख पाहुणे म्हणून सहभागी झाले होते.
यावेळी जिल्हा अग्रणी बँक परभणीचे व्यवस्थापक रामचंद्र अकोलवार आणि भारतीय स्टेट बँकेच्या वित्तीय साक्षरता विभागाचे सुनील हतेकर यांनी महिलांना विविध बँकिंग सेवा, विमा योजना, कर्ज योजना तसेच आर्थिक सक्षमीकरणासाठी उपलब्ध संधींबाबत सविस्तर मार्गदर्शन केले.
तसेच जिल्हा कौशल्य विकास, रोजगार व उद्योजकता मार्गदर्शन केंद्राचे जिल्हा समन्वयक सचिन चव्हाण आणि कौशल्य विकास मार्गदर्शन अधिकारी मदन शिंदे यांनी रोजगाराच्या विविध संधी व शासकीय योजनांची माहिती उपस्थित महिलांना दिली. महिलांनी या मार्गदर्शनाचा लाभ घेत विविध योजनांविषयी माहिती जाणून घेतली.
सामाजिक कार्यकर्ते सुनील गायकवाड यांनी महिलांना स्वावलंबनासाठी शासकीय योजनांचा प्रभावी वापर करण्याचे आवाहन केले. शीला रामेश्वर काजळे यांनी महिलांना योजनांचा लाभ घेताना येणाऱ्या अडचणी दूर करण्यासाठी सहकार्य करण्याचे आश्वासन दिले.
कार्यक्रमाचे प्रास्ताविक उपमुख्याधिकारी भगवान चव्हाण यांनी केले. नगरपरिषदेमार्फत राबविण्यात येणाऱ्या विविध योजनांची माहिती सहाय्यक प्रकल्प अधिकारी शीतल सोळंके यांनी दिली. सूत्रसंचालन कर निरीक्षक अंकुश जाधव यांनी केले.
कार्यक्रमाच्या यशस्वीतेसाठी आनंद दायमा, धनंजय सिंह बायस, दिनेश टाक, महेंद्र ढाले, कृष्णा कदम, आनंद काबरा, नागेश चिखलीकर, जितू अजीम शेख, शिल्पा मगर, शारदा इंगळे, विद्या महाडिक तसेच नगर परिषदेमधील अधिकारी व कर्मचाऱ्यांनी परिश्रम घेतले. कार्यक्रमाला एकल महिला मोठ्या संख्येने उपस्थित होत्या.
