श्रीरामपूर (प्रतिनिधी):
ठाकरे गटाशी दुसऱ्यांदा गद्दारी करत शिंदे गटात प्रवेश केलेले शिर्डी लोकसभा मतदारसंघाचे खासदार भाऊसाहेब वाकचौरे यांच्या विरोधात श्रीरामपूर तालुक्यात शिवसैनिकांमध्ये तीव्र संतापाची लाट उसळली आहे. शिवसेना (उद्धव बाळासाहेब ठाकरे) पक्षाचे तालुका प्रमुख लखन भगत यांच्या नेतृत्वाखाली बेलापूर–राहुरी रोडवर जोरदार आंदोलन करण्यात आले.
यावेळी आंदोलनकर्त्यांनी खासदार वाकचौरे यांच्या प्रतिमेला जोडे मारत निषेध व्यक्त केला. “गद्दार खासदारांचा निषेध असो”, “शिवसैनिकांचा विश्वासघात चालणार नाही” अशा घोषणांनी संपूर्ण परिसर दणाणून गेला होता.
शिवसैनिकांनी आरोप केला की, सर्वसामान्य कार्यकर्त्यांनी जीवाचे रान करून निवडून दिलेल्या खासदारांनी स्वार्थासाठी पुन्हा एकदा पक्षाशी गद्दारी केली. त्यामुळे शिवसैनिकांमध्ये मोठ्या प्रमाणात नाराजी निर्माण झाली असून, “आता त्यांना तालुक्यात फिरू देणार नाही,” असा इशाराही आंदोलनकर्त्यांनी दिला.
या आंदोलनामुळे बेलापूर–राहुरी रोड परिसरात काही काळ तणावाचे वातावरण निर्माण झाले होते. पोलिसांनी परिस्थिती नियंत्रणात ठेवत आंदोलन शांततेत पार पाडले.
