कुरुंदवाड | प्रतिनिधी
कुरुंदवाड शहरातील विविध मस्जिदींमध्ये मोहरम निमित्त खत्तल रात्र आणि खाई खेळणीचे धार्मिक कार्यक्रम गुरुवारी रात्री भक्तिभावपूर्ण वातावरणात उत्साहात संपन्न झाले. मोहरमच्या नवव्या रात्रीनिमित्त पिरांना पटका चढवणे, नवस फेडणे, आलावा (अग्नीकुंड) पूजन तसेच खाई खेळणीपूर्वीचे विविध धार्मिक विधी पार पडले.
या कार्यक्रमासाठी हिंदू-मुस्लिम समाजातील महिला व पुरुष मोठ्या संख्येने सहभागी झाले होते. सामाजिक सलोखा, राष्ट्रीय एकात्मता आणि सर्वधर्मसमभावाची परंपरा यावेळी जपली गेली.
मोहरम उत्सवात मस्जिद किंवा मंदिरासमोर गोलाकार खुदाई करून तयार करण्यात आलेल्या पवित्र अग्नीकुंडाला ‘आलावा’ असे संबोधले जाते. या आलाव्याच्या पूजनासाठी शहरातील विविध भागांतील महिला मोठ्या श्रद्धेने उपस्थित राहिल्या होत्या.
महिलांनी आपल्या घरातून मलिदा, पुरणपोळी, भाजी-भाकरी, दहीभात, साखरभात तसेच विविध पारंपरिक पदार्थांचा नैवेद्य आणून अग्नीकुंडासमोर अर्पण केला. कुटुंबाच्या सुख-समृद्धीसाठी आणि मनोकामना पूर्ण होण्यासाठी प्रार्थना करण्यात आली. नवस पूर्ण झालेल्या भाविकांनी पिरांना पटका अर्पण करून नवस फेडण्याची धार्मिक परंपरा पार पाडली.
या उत्सवात हिंदू आणि मुस्लिम समाजातील महिला कोणताही भेदभाव न ठेवता एकत्रित सहभागी झाल्या. त्यामुळे मोहरम उत्सवाला सामाजिक एकात्मता, बंधुभाव आणि सांप्रदायिक सलोख्याचे विशेष स्वरूप प्राप्त झाले.
धार्मिक विधी पूर्ण झाल्यानंतर पारंपरिक खाई खेळणीचा कार्यक्रम मोठ्या उत्साहात पार पडला. संपूर्ण परिसर भक्तिमय आणि उत्सवी वातावरणाने भारावून गेला होता.
