भडगाव प्रतिनिधी
कजगाव जवळ सोमवारी मध्यरात्री भीषण अपघात घडला. धार्मिक दिंडीसोबत असलेल्या भाविकांच्या ट्रॅक्टरला भरधाव ट्रकने जोरदार धडक दिल्याने एका भाविकाचा जागीच मृत्यू झाला, तर दोन जण गंभीर आणि तेरा भाविक किरकोळ जखमी झाले आहेत.
मिळालेल्या माहितीनुसार, महिंदळे गावातून धार्मिक पायी दिंडी मार्गस्थ झाली होती. दिंडीसोबत काही भाविक ट्रॅक्टरमधून प्रवास करत होते. दरम्यान, कजगावजवळ महामार्गावर मागून भरधाव वेगाने येणाऱ्या इंडियन गॅस सिलेंडर वाहतूक करणाऱ्या ट्रकने ट्रॅक्टरला जोरदार धडक दिली.
धडक इतकी भीषण होती की ट्रॅक्टरचा मागील भाग अक्षरशः चुराडा झाला. या अपघातात एका भाविकाचा घटनास्थळीच मृत्यू झाला. तसेच दोन जण गंभीर जखमी झाले असून त्यांना पुढील उपचारासाठी चाळीसगाव येथील रुग्णालयात दाखल करण्यात आले आहे. इतर तेरा भाविक किरकोळ जखमी झाले आहेत.
अपघातानंतर स्थानिक नागरिकांनी तातडीने घटनास्थळी धाव घेत मदतकार्य सुरू केले. घटनेची माहिती मिळताच पोलिसांनी घटनास्थळी पोहोचून पंचनामा केला. अपघातग्रस्त ट्रॅक्टर आणि ट्रक रस्त्याच्या कडेला हटवून वाहतूक सुरळीत करण्यात आली.
दरम्यान, ट्रक चालकाची चौकशी सुरू असून अपघाताचे नेमके कारण शोधण्यासाठी पोलिसांकडून पुढील तपास सुरू आहे.
या दुर्दैवी घटनेमुळे महिंदळे गावासह संपूर्ण भडगाव तालुक्यात शोककळा पसरली असून मृत भाविकाच्या कुटुंबावर दुःखाचा डोंगर कोसळला आहे.
