शहादा, दि. ३० : येथील पूज्य साने गुरुजी विद्या प्रसारक मंडळ संचलित कला, विज्ञान व वाणिज्य कनिष्ठ महाविद्यालयात नवीन शैक्षणिक वर्षाच्या निमित्ताने शिक्षक-पालक सभेचे आयोजन करण्यात आले. या सभेच्या अध्यक्षस्थानी कनिष्ठ महाविद्यालयाच्या उपप्राचार्या प्रा. सौ. कल्पना पटेल या होत्या.
कार्यक्रमाचे प्रास्ताविक शिक्षक-पालक सभेचे संयोजक प्रा. डॉ. शिवनाथ पटेल यांनी केले. त्यांनी विद्यार्थ्यांच्या शैक्षणिक प्रगतीसाठी महाविद्यालयात राबविण्यात येणाऱ्या विविध उपक्रमांची तसेच उपलब्ध करून देण्यात येणाऱ्या सुविधा व नियोजनाची माहिती उपस्थित पालकांना दिली.
यावेळी महाविद्यालयाचा माजी विद्यार्थी चिन्मय विजय सामुद्रे याने सी.ए. परीक्षेत यश मिळवल्याबद्दल त्याचा विशेष सत्कार करण्यात आला. उपप्राचार्या प्रा. सौ. कल्पना पटेल यांच्या हस्ते शाल व पुष्पगुच्छ देऊन त्याचा गौरव करण्यात आला. विद्यार्थ्यांनी मिळवलेले हे यश इतरांसाठी प्रेरणादायी असल्याचे मत यावेळी व्यक्त करण्यात आले.
पालकांना मार्गदर्शन करताना उपप्राचार्या प्रा. सौ. कल्पना पटेल म्हणाल्या की, “पालक सभा ही पालक, शिक्षक आणि महाविद्यालय प्रशासन यांच्यात सुसंवाद निर्माण करणारे प्रभावी माध्यम आहे. यामुळे विद्यार्थ्यांच्या शैक्षणिक प्रगतीचा आढावा घेणे सोपे होते.” त्यांनी विद्यार्थ्यांच्या वाढत्या गळतीबाबत चिंता व्यक्त करत पालकांनी आपल्या पाल्याला नियमित महाविद्यालयात पाठवावे, असे आवाहन केले. शासनाने महाविद्यालयांमध्ये ऑनलाईन उपस्थिती प्रणाली सुरू केल्याने विद्यार्थ्यांनी वेळेवर वर्गात उपस्थित राहणे आवश्यक असल्याचेही त्यांनी सांगितले.
या कार्यक्रमास कनिष्ठ महाविद्यालयाचे पर्यवेक्षक प्रा. के. एच. नागेश, ज्येष्ठ प्राध्यापक व्ही. सी. डोळे, प्रा. ए. पी. पाटील, प्रा. डॉ. शिवनाथ पटेल, प्रा. सौ. भारती पाटील, प्रा. उदय पटेल, प्रा. सविता पाटील यांच्यासह सर्व प्राध्यापक वृंद आणि पालक मोठ्या संख्येने उपस्थित होते.
कार्यक्रमाचे सूत्रसंचालन प्रा. मनोज चौधरी यांनी केले, तर आभार प्रदर्शन प्रा. चंद्रकांत पाटील यांनी मानले. पालकांच्या उत्स्फूर्त प्रतिसादामुळे सभा यशस्वीपणे पार पडली.
