अंबाजोगाई प्रतिनिधी :
अंबाजोगाई तालुक्यातील कोद्री गावातील शिवारात एका अज्ञात हिंस्र प्राण्याने धुमाकूळ घालत लोखंडी शेडमध्ये घुसून तब्बल १४ शेळ्यांचा फडशा पाडल्याची धक्कादायक घटना समोर आली आहे. या घटनेमुळे परिसरातील शेतकरी आणि पशुपालकांमध्ये भीतीचे वातावरण निर्माण झाले आहे.
कोद्री शिवारातील शेतकरी आबासाहेब पोटभरे यांच्या शेतातील शेडमध्ये हा प्रकार घडला. एकाच रात्रीत झालेल्या या हल्ल्यात १४ शेळ्यांचा मृत्यू झाला असून त्यामुळे पोटभरे यांचे मोठे आर्थिक नुकसान झाले आहे. उदरनिर्वाहाचे महत्त्वाचे साधन हिरावल्याने कुटुंबावर आर्थिक संकट ओढवले आहे.
घटनेची माहिती मिळताच वनविभागाचे अधिकारी, संबंधित विभागाचे कर्मचारी तसेच पशुवैद्यकीय अधिकारी घटनास्थळी दाखल झाले. त्यांनी पाहणी करून मृत शेळ्यांचे शवविच्छेदन (पोस्टमार्टम) केले असून पोलिसांकडून पंचनामा देखील करण्यात आला आहे.
या हल्ल्यामागे नेमका कोणता हिंस्र प्राणी आहे, याचा शोध वनविभागाकडून घेतला जात आहे. प्राथमिक अंदाजानुसार बिबट्या, लांडगा किंवा इतर कोणत्यातरी हिंस्र पशूचा वावर असण्याची शक्यता व्यक्त केली जात आहे. याबाबत अधिकृत पुरावे गोळा करण्याचे काम सुरू आहे.
दरम्यान, या घटनेनंतर स्थानिक ग्रामस्थांनी आणि शेतकऱ्यांनी शासनाकडे आबासाहेब पोटभरे यांना तातडीने आर्थिक मदत द्यावी तसेच परिसरातील हिंस्र प्राण्याचा बंदोबस्त करावा, अशी जोरदार मागणी केली आहे.
वनविभागाने नागरिकांना रात्रीच्या वेळी शेतात किंवा एकांत भागात जाताना विशेष काळजी घेण्याचे आवाहन केले असून, कोणतीही संशयास्पद हालचाल आढळल्यास तातडीने प्रशासनाला माहिती देण्यास सांगितले आहे.
