अखिल भारतीय ग्राहक पंचायत शाखेचा नागरिकांसाठी उपयुक्त उपक्रम
कन्नड | प्रतिनिधी
अखिल भारतीय ग्राहक पंचायत, कन्नड शाखेच्या वतीने शासकीय विश्रामगृह, कन्नड येथे अन्न व औषध प्रशासन विभाग तसेच वैध मापन शास्त्र विभागाच्या संयुक्त विद्यमाने मार्गदर्शन बैठकीचे यशस्वी आयोजन करण्यात आले. या बैठकीत व्यापारी, उद्योजक आणि नागरिकांना विविध कायदे, नियम व शासकीय प्रक्रियेबाबत सविस्तर माहिती देण्यात आली.
कार्यक्रमाला अन्न व औषध प्रशासन विभागाचे अन्न सुरक्षा अधिकारी फरीद सिद्दीकी, माजी उपनियंत्रक शिवहरी मुंडे तसेच वैध मापन शास्त्र निरीक्षक राजेंद्र वसंत व्यवहारे हे प्रमुख मार्गदर्शक म्हणून उपस्थित होते.
यावेळी अन्न सुरक्षा व मानके कायदा (FSSAI), परवाना प्रक्रिया, औषध विक्रीसंबंधी नियम, वजन व माप यंत्रांची पडताळणी, ग्राहक संरक्षण कायदा तसेच व्यवसाय करताना घ्यावयाची आवश्यक काळजी याबाबत मार्गदर्शन करण्यात आले. संबंधित विभागीय नियमांचे पालन केल्यास व्यवसाय अधिक पारदर्शक आणि ग्राहकाभिमुख होण्यास मदत होते, असेही अधिकाऱ्यांनी सांगितले.
बैठकीदरम्यान उपस्थित व्यापारी, हॉटेल व रेस्टॉरंट व्यावसायिक, किराणा दुकानदार, दूध डेअरी चालक, वजन-माप व्यवसायिक तसेच नागरिकांनी विविध प्रश्न उपस्थित करून आपल्या अडचणी व शंकांचे निरसन करून घेतले.
या कार्यक्रमाचे आयोजन अखिल भारतीय ग्राहक पंचायत, कन्नडचे तालुकाध्यक्ष रुपेश भारुका यांनी केले होते. त्यांनी उपस्थित सर्व मान्यवर, अधिकारी, व्यापारी व नागरिकांचे आभार मानत भविष्यातही अशा मार्गदर्शनपर उपक्रमांचे आयोजन करण्यात येईल, असे सांगितले.
या बैठकीस रामदास ठोंबरे (संघटन मंत्री, देवगिरी प्रांत), धनंजय मुळे (उपाध्यक्ष, देवगिरी प्रांत), ॲड. स्वप्निल उपासनी, रोहित पीरथानी, सुनील गंगवाल, दिलीप पवार, रामचंद्र लालवानी, सहयोज जावले, वर्षा लहाने यांच्यासह विविध व्यापारी संघटनांचे प्रतिनिधी, व्यापारी, उद्योजक व नागरिक मोठ्या संख्येने उपस्थित होते.
