कन्नड | प्रतिनिधी
चांदीचे ब्रेसलेट घेण्यासाठी माहेराहून ५० हजार रुपये आणावेत, अशी मागणी करत पत्नीचा शारीरिक व मानसिक छळ केल्याप्रकरणी पतीविरोधात कन्नड शहर पोलिस ठाण्यात तक्रार दाखल करण्यात आली आहे.
याबाबत रेणुका रमेश कुच्चे (वय २१) यांनी दिलेल्या तक्रारीनुसार, त्यांचा विवाह २२ मे २०२३ रोजी साताळा चौका येथील रमेश डोंगरसिंग कुच्चे यांच्याशी हिंदू रीतीरिवाजाप्रमाणे झाला होता. विवाहानंतर दोघेही कामानिमित्त श्रीरामपूर येथे वास्तव्यास होते.
तक्रारीत नमूद केल्यानुसार, सुरुवातीला पतीने व्यवस्थित वागणूक दिली. मात्र त्यानंतर चांदीचे ब्रेसलेट घेण्यासाठी माहेराहून ५० हजार रुपये आणण्याची मागणी करण्यात आली. रेणुका यांच्या आई मोलमजुरी करून उदरनिर्वाह करत असल्याने पैसे आणणे शक्य नसल्याचे त्यांनी सांगितले.
यानंतर पतीकडून सतत शिवीगाळ, मारहाण व मानसिक त्रास दिला जात असल्याचा आरोप तक्रारीत करण्यात आला आहे. किरकोळ कारणांवरून चापट-बुक्क्यांनी मारहाण करणे, भांडणे करणे तसेच चारित्र्यावर संशय घेऊन जीवे मारण्याची धमकी देण्यात आल्याचेही तक्रारीत म्हटले आहे. या त्रासाला कंटाळून त्या गेल्या सुमारे एका वर्षापासून माहेरी आई व आजोबांकडे राहत असल्याचे सांगण्यात आले.
दरम्यान, या प्रकरणी महिला तक्रार निवारण केंद्रातही अर्ज दाखल करण्यात आला होता. मात्र पती एकाही तारखेला हजर राहिला नसल्याचे तक्रारदाराने म्हटले आहे.
या प्रकरणी कन्नड शहर पोलिस ठाण्यात पतीविरोधात गुन्हा दाखल करण्यात आला असून पोलिस निरीक्षक रंगराव सानप यांच्या मार्गदर्शनाखाली पोलिस हेड कॉन्स्टेबल मोईस बेग पुढील तपास करत आहेत.
