शहर संघटक शेख वजीर यांचा भाजपमध्ये प्रवेश
अंबाजोगाई प्रतिनिधी :- अंबाजोगाईच्या राजकीय वर्तुळात रविवारी अनपेक्षित घडामोड घडली. राष्ट्रवादी काँग्रेस पक्ष (अजित पवार गट) चे अंबाजोगाई शहर संघटक शेख वजीर यांनी भारतीय जनता पक्षात प्रवेश करत पक्षाला स्थानिक पातळीवर मोठा धक्का दिला. विशेष म्हणजे, कोणतीही निवडणूक किंवा राजकीय वातावरण नसताना झालेल्या या पक्षप्रवेशाची शहरात मोठी चर्चा सुरू आहे.
शेख वजीर यांनी अंबाजोगाईचे नगराध्यक्ष नंदकिशोर मुंदडा यांच्या उपस्थितीत भारतीय जनता पक्षात प्रवेश केला. यावेळी भाजपचे शहराध्यक्ष तथा नगरसेवक संजय गंभीरे, प्रभाग क्रमांक १ चे नगरसेवक किरण भालेकर तसेच युवा नेते अतुल जाधव उपस्थित होते.
अंबाजोगाई शहरात तसेच प्रभागात महिला, युवक आणि सर्वसामान्य नागरिकांमध्ये शेख वजीर यांनी आपल्या सामाजिक कार्य आणि जनसंपर्काच्या जोरावर वेगळी ओळख निर्माण केली आहे. ते माजी नगराध्यक्ष राजकिशोर मोदी यांचे विश्वासू व निष्ठावंत कार्यकर्ते म्हणूनही परिचित आहेत. त्यामुळे त्यांच्या पक्षप्रवेशाला केवळ वैयक्तिक निर्णय न मानता स्थानिक राजकारणातील महत्त्वाची घडामोड म्हणून पाहिले जात आहे.
विशेषतः प्रभाग क्रमांक १ मध्ये शेख वजीर यांचा मोठा जनसंपर्क आणि प्रभाव असल्याचे मानले जाते. त्यामुळे त्यांच्या भाजप प्रवेशामुळे त्या प्रभागात पक्षाचे संघटन अधिक मजबूत होण्याची शक्यता व्यक्त केली जात आहे. राष्ट्रवादी काँग्रेस पक्ष (अजित पवार गट) च्या अंबाजोगाई शहर संघटकाने भाजपमध्ये प्रवेश केल्याने स्थानिक राजकारणात नव्या समीकरणांची चर्चा सुरू झाली आहे.
शेख वजीर यांच्या प्रवेशामुळे भारतीय जनता पक्षाला अंबाजोगाई शहरात, विशेषतः प्रभाग क्रमांक १ मध्ये संघटनात्मक बळ मिळाले असून, पक्षवाढीस नवी ऊर्जा मिळाल्याचे भाजप कार्यकर्त्यांकडून सांगितले जात आहे.
