मुंबई | प्रतिनिधी
पत्रकारिता क्षेत्रात निर्भीड, निष्पक्ष आणि समाजहिताची भूमिका जपत उल्लेखनीय कार्य करणारे पत्रकार सुरक्षा समिती पश्चिम महाराष्ट्र विभागाचे संघटक तथा दैनिक तुफान क्रांतीचे संपादक मिर्झागालिब रज्जाक मुजावर यांना आर्यारवी एंटरटेनमेंटतर्फे प्रदान करण्यात येणारा प्रतिष्ठेचा ‘शब्दवेध गौरव पुरस्कार २०२६’ जाहीर झाला आहे. पत्रकारिता आणि सामाजिक क्षेत्रातील त्यांच्या उल्लेखनीय योगदानाची दखल घेऊन हा मानाचा पुरस्कार प्रदान करण्यात येत आहे.
सिने-नाट्य अभिनेते, दिग्दर्शक व पत्रकार महेश्वर तेटांबे यांच्या संकल्पनेतून आयोजित करण्यात आलेल्या पहिला पत्रकार, मुक्त पत्रकार, संपादक, कला, साहित्य व समाजसेवक पुरस्कार सोहळा २०२६ मध्ये हा सन्मान प्रदान करण्यात येणार आहे. रविवार, १२ जुलै २०२६ रोजी सकाळी ९.३० वाजता दादर (पूर्व), मुंबई येथील सुरेंद्र गावस्कर हॉल, मुंबई मराठी ग्रंथसंग्रहालय येथे हा भव्य पुरस्कार सोहळा संपन्न होणार आहे.
मिर्झागालिब मुजावर यांनी पत्रकारितेच्या माध्यमातून समाजातील सर्वसामान्यांच्या समस्या प्रभावीपणे मांडण्याचे काम केले आहे. सत्य, न्याय आणि जनहितासाठी त्यांनी सातत्याने निर्भीड भूमिका घेत पत्रकारितेचा सामाजिक धर्म जपला आहे. त्यांच्या उत्कृष्ट कार्याची दखल घेत त्यांची पत्रकार सुरक्षा समितीच्या पश्चिम महाराष्ट्र संघटकपदी नियुक्ती करण्यात आली असून, त्यांच्या प्रामाणिक, निष्ठावान आणि प्रभावी कामगिरीमुळे त्यांना वेळोवेळी महत्त्वाच्या जबाबदाऱ्या देण्यात आल्या आहेत.
पत्रकारांच्या हक्कांचे संरक्षण, त्यांच्या सुरक्षेचे प्रश्न तसेच पत्रकार बांधवांमध्ये संघटनात्मक एकता निर्माण करण्यासाठी त्यांनी उल्लेखनीय कार्य केले आहे. त्यांच्या नेतृत्वाखाली अनेक पत्रकारांच्या प्रश्नांना न्याय मिळवून देण्यासाठी प्रभावी प्रयत्न करण्यात आले असून, पत्रकारिता क्षेत्रात त्यांनी स्वतःचे वेगळे स्थान निर्माण केले आहे.
दैनिक तुफान क्रांतीच्या माध्यमातून सामाजिक, शैक्षणिक, सांस्कृतिक आणि जनहिताच्या विषयांवर सातत्याने प्रकाश टाकत त्यांनी लोकजागृतीचे कार्य केले आहे. त्यांची निर्भीड आणि समाजाभिमुख पत्रकारिता नव्या पिढीतील पत्रकारांसाठी प्रेरणादायी ठरत आहे.
‘शब्दवेध गौरव पुरस्कार २०२६’ हा सन्मान त्यांच्या कार्याचा गौरव असून, भविष्यातही ते पत्रकारांच्या हक्कांसाठी आणि समाजहितासाठी अधिक जोमाने कार्यरत राहतील, असा विश्वास विविध क्षेत्रातील मान्यवरांनी व्यक्त केला आहे.
“सत्यासाठी निडरपणे लढणारी लेखणी आणि समाजहितासाठी अखंड झटणारी वृत्ती हीच खऱ्या पत्रकाराची ओळख असते. मिर्झागालिब मुजावर यांनी आपल्या कार्यातून ही ओळख अधिक दृढ केली आहे. त्यांचा हा सन्मान संपूर्ण पत्रकारिता क्षेत्रासाठी अभिमानाची बाब आहे,” अशा शब्दांत त्यांच्यावर अभिनंदनाचा वर्षाव होत आहे. त्यांच्या पुढील वाटचालीस हार्दिक शुभेच्छा व्यक्त करण्यात येत आहेत.
