खटाव प्रतिनिधी
मायणी परिसरात गेल्या काही दिवसांपासून मोठ्या प्रमाणात जिलेटिन स्फोटक पदार्थ सापडत असल्याने नागरिकांमध्ये भीतीचे वातावरण निर्माण झाले आहे. दोन दिवसांपूर्वीच सुमारे १७ लाख रुपये किमतीचा जिलेटिन स्फोटक साठा जप्त करण्यात आल्याची माहिती समोर आली असून, या प्रकारामुळे परिसरात खळबळ उडाली आहे.
इतक्या मोठ्या प्रमाणात स्फोटक पदार्थ परिसरात कसे पोहोचत आहेत, याबाबत नागरिकांकडून गंभीर प्रश्न उपस्थित केले जात आहेत. बेकायदेशीररीत्या स्फोटकांची वाहतूक आणि साठवण होत असल्याचा संशय व्यक्त केला जात असून, यामागील मुख्य सूत्रधारांचा शोध घेण्याची मागणी जोर धरत आहे.
स्थानिकांच्या मते, जिलेटिन स्फोटक पदार्थांची खुलेआम विक्री आणि चोरीछुप्या पद्धतीने वाहतूक सुरू असून संबंधित यंत्रणांनी याकडे गांभीर्याने लक्ष देणे आवश्यक आहे. अशा धोकादायक पदार्थांची सहज उपलब्धता भविष्यात मोठ्या दुर्घटनेला कारणीभूत ठरू शकते, अशी भीती नागरिकांनी व्यक्त केली आहे.
या प्रकरणाची सखोल चौकशी करून दोषींवर कठोर कारवाई करावी तसेच जिलेटिन स्फोटक पदार्थांच्या बेकायदेशीर विक्री आणि वाहतुकीवर तातडीने निर्बंध घालावेत, अशी मागणी नागरिकांकडून करण्यात येत आहे.
