प्रतिनिधी :
सरकारी कामाचे बिल मंजूर करण्यासाठी कंत्राटदाराकडून ३८ हजार रुपयांची लाच घेताना सार्वजनिक बांधकाम विभागाच्या (PWD) शाखा अभियंत्याला लाचलुचपत प्रतिबंधक विभागाने (ACB) रंगेहाथ पकडले. या कारवाईमुळे शाहूवाडी तालुक्यासह संपूर्ण कोल्हापूर जिल्ह्यात खळबळ उडाली आहे.
विजयकुमार विलास वनमोरे (शाखा अभियंता / कनिष्ठ अभियंता, सार्वजनिक बांधकाम विभाग, शाहूवाडी) असे अटक करण्यात आलेल्या अधिकाऱ्याचे नाव आहे.
मिळालेल्या माहितीनुसार, एका कंत्राटदाराने शिराळे वारूळ रस्ता-पूल तसेच कर्नाळवाडी ते सोनारवाडी दरम्यानच्या दोन किलोमीटर रस्त्याच्या मुरमीकरण व खडीकरणाचे काम पूर्ण केले होते. मात्र संबंधित कामाचे प्रलंबित बिल मंजूर करण्यासाठी आरोपी अभियंत्याने सुरुवातीला ३४ हजार ७०० रुपये, त्यानंतर ३८ हजार रुपयांची लाच मागितल्याचे समोर आले.
लाच देण्याची इच्छा नसल्याने संबंधित कंत्राटदाराने थेट लाचलुचपत प्रतिबंधक विभागाकडे तक्रार दाखल केली. तक्रारीची पडताळणी केल्यानंतर एसीबीच्या पथकाने शाहूवाडी येथील कार्यालयात सापळा रचला. यावेळी कंत्राटदाराकडून ३८ हजार रुपयांची लाच स्वीकारताना विजयकुमार वनमोरे याला रंगेहाथ पकडण्यात आले.
याप्रकरणी शाहूवाडी पोलीस ठाण्यात गुन्हा दाखल करण्यात आला असून पुढील तपास सुरू आहे.
ही कारवाई लाचलुचपत प्रतिबंधक विभागाच्या उपाधीक्षक वैष्णवी पाटील यांच्या मार्गदर्शनाखाली करण्यात आली.
