भोर प्रतिनिधी
आज दि. ३ जुलै रोजी झालेल्या मुसळधार पावसामुळे भोर–महाड वरंधा घाट मार्गावरील शिरगाव हद्दीत सकाळच्या सुमारास मोठी दरड कोसळल्याची घटना घडली आहे. दरड कोसळल्याने माती, दगड तसेच मोठी झाडे रस्त्यावर आल्यामुळे या मार्गावरील वाहतूक पूर्णपणे ठप्प झाली आहे.
सुदैवाने दरड कोसळली त्यावेळी रस्त्यावर कोणतेही वाहन किंवा प्रवासी नसल्याने मोठी जीवितहानी टळली. मात्र अचानक घडलेल्या या घटनेमुळे वाहनचालकांमध्ये भीतीचे वातावरण निर्माण झाले.
घटनेची माहिती मिळताच भोर प्रशासन आणि संबंधित विभागाचे अधिकारी तात्काळ घटनास्थळी दाखल झाले असून, रस्त्यावर पडलेला राडारोडा हटवण्याचे काम युद्धपातळीवर सुरू करण्यात आले आहे.
दरम्यान, घाट परिसरात सतत पाऊस सुरू असल्याने नागरिकांनी आवश्यक ती काळजी घ्यावी तसेच प्रशासनाच्या सूचनांचे पालन करावे, असे आवाहन करण्यात आले आहे.
