संपूर्ण पॅनेल बहुमताने विजयी; नवनिर्वाचित पदाधिकाऱ्यांवर अभिनंदनाचा वर्षाव
दापोली, रत्नागिरी | दि. ४ ऑक्टोबर २०२६ | प्रतिनिधी :
दापोली येथे रविवारी झालेल्या केमिस्ट असोसिएशनच्या चुरशीच्या निवडणुकीत ‘निर्भय पॅनेल’ने दणदणीत विजय मिळवत संपूर्ण पॅनेल विजयी केले. निकाल जाहीर होताच निर्भय पॅनेलच्या समर्थकांनी जल्लोष केला. या विजयामुळे जिल्ह्यातील केमिस्ट बांधवांमध्ये उत्साहाचे वातावरण निर्माण झाले असून नवनिर्वाचित पदाधिकाऱ्यांचे विविध स्तरांतून अभिनंदन करण्यात येत आहे.
केमिस्ट बांधवांच्या विविध समस्या, व्यवसायातील अडचणी आणि त्यांच्या हक्कांसाठी संघटितपणे आवाज उठविण्याच्या उद्देशाने निर्भय पॅनेल निवडणुकीच्या रिंगणात उतरले होते. मा. आप्पासाहेब शिंदे (केमिस्ट हृदयसम्राट) यांच्या मार्गदर्शनाखाली आणि प्रेरणेने पॅनेलने निवडणूक लढवली. मतदारांनी पॅनेलच्या उमेदवारांवर विश्वास व्यक्त करत त्यांना बहुमताने विजयी केले.
नवनिर्वाचित पदाधिकारी व कार्यकारिणी
- अध्यक्ष : राजेश घोसाळकर
- कार्याध्यक्ष : संदीप गुजर
- उपाध्यक्ष : अभिजित (राजू) आवळे
- सचिव : सचिन (बबलु) कोतवडेकर
- सहसचिव : रुपेश शेलार
- खजिनदार : प्रफुल्ल लांजेकर
- सदस्य : आरिफ मेमन व निहार गुडेकर
निकालाची घोषणा होताच निर्भय पॅनेलच्या कार्यकर्त्यांनी आणि समर्थकांनी एकच जल्लोष केला. नवनिर्वाचित अध्यक्ष राजेश घोसाळकर आणि कार्याध्यक्ष संदीप गुजर यांनी सर्व केमिस्ट बांधवांचे आभार मानले.
संघटनेच्या माध्यमातून व्यवसायातील अडचणी सोडविण्यासाठी तसेच सर्वांना सोबत घेऊन संघटनेचे काम अधिक मजबूत करण्यासाठी कटिबद्ध राहणार असल्याची ग्वाही नवनिर्वाचित पदाधिकाऱ्यांनी दिली. निर्भय पॅनेलच्या या विजयामुळे केमिस्ट असोसिएशनच्या आगामी कार्यकारिणीकडून सदस्यांच्या अपेक्षा वाढल्या आहेत.
