मान्यवरांची उपस्थिती; ढोल-ताशांच्या गजरात गणेशमूर्तीसमोर भक्तांचा जल्लोष
पेण : वार्ताहर : रायगड जिल्ह्यातील पेण तालुका आणि पेण शहर हे श्री गणेशमूर्तींचे माहेरघर म्हणून प्रसिद्ध आहे. पेणच्या गणेशमूर्तींना महाराष्ट्रासह देश-विदेशात मोठी मागणी असून, दरवर्षी येथील गणेशमूर्तींची महाराष्ट्रातील विविध जिल्ह्यांसह लंडन, अमेरिका यांसह अनेक देशांमध्ये निर्यात केली जाते.
याच गणेशभक्तीची परंपरा जपत पेण तालुक्यातील जोहे गावात पत्रकार देवा पेरवी यांच्या पुढाकाराने जोहेचा राजा प्रतिष्ठानतर्फे भव्य महाआरती सोहळा २०२६ उत्साहात व भक्तिमय वातावरणात पार पडला. दरवर्षीप्रमाणे यंदाही या सोहळ्यास विविध क्षेत्रांतील मान्यवरांची उपस्थिती लाभली.
या सोहळ्यास महाराष्ट्र राज्याचे पालकमंत्री तथा मंत्री भरतशेठ गोगावले, रायगड जिल्हा परिषद अलिबागचे सभापती वैकुंठशेठ पाटील, अलिबागचे आमदार महेंद्र दळवी यांच्यासह रायगड जिल्हा पोलीस दलातील वरिष्ठ अधिकारी व पोलीस कर्मचारी उपस्थित होते.
जोहेचा राजा प्रतिष्ठानच्या या भव्य सोहळ्यास जोहे गावातील तरुण मित्र मंडळे, ग्रामस्थ, महिला मंडळ तसेच प्रतिष्ठानचे युवा कार्यकर्ते व पदाधिकारी मोठ्या संख्येने सहभागी झाले होते. महाआरतीच्या वेळी परिसरात भक्तिमय वातावरण निर्माण झाले होते.
यावेळी पत्रकार देवा पेरवी यांनी ‘जोहेचा राजा’ गणेशमूर्ती उचलून अनोख्या पद्धतीने नृत्याचा जल्लोष केला. त्यांच्या या उत्स्फूर्त सहभागाने उपस्थित तरुणाई, महिला मंडळ व ग्रामस्थांमध्ये मोठा उत्साह निर्माण झाला. ढोल-ताशांच्या गजरात आणि जल्लोषपूर्ण वातावरणात उपस्थितांनी या सोहळ्याचा मनमुराद आनंद घेतला.
गणेशभक्ती, सामाजिक एकोपा आणि उत्साहाचा संगम घडविणारा हा महाआरती सोहळा जोहे गावात मोठ्या थाटामाटात संपन्न झाला. जोहेचा राजा प्रतिष्ठानच्या वतीने आयोजित या कार्यक्रमाचे उपस्थित मान्यवर, ग्रामस्थ आणि गणेशभक्तांनी कौतुक केले.
