अलिबाग | प्रतिनिधी
अलिबाग तालुक्यातील सासवणे, आवास आणि नवेदर कोळगाव परिसरात सलग तीन दिवस सुरू असलेल्या मुसळधार पावसामुळे आणि समुद्रात आलेल्या भरतीमुळे अनेक भाग जलमय झाले आहेत. साचलेल्या पुराच्या पाण्यामुळे अनेक रस्ते पाण्याखाली गेल्याने वाहतूक पूर्णपणे विस्कळीत झाली असून नागरिकांचे जनजीवन प्रभावित झाले आहे.
सासवणे–आवास मार्गावरील अनेक ठिकाणी पाणी साचल्याने वाहनांची ये-जा बंद झाली आहे. तसेच सासवणे येथील रामनगरकडे जाणारा मुख्य रस्ता पूर्णपणे पाण्याखाली गेल्याने हा मार्ग वाहतुकीसाठी बंद करण्यात आला आहे.
दरम्यान, सासवणे काना गावातही पुराचे पाणी शिरल्याने गावातील रस्ते जलमय झाले असून क्रिकेट मैदानालाही तलावाचे स्वरूप प्राप्त झाले आहे. परिसरातील नागरिकांना दैनंदिन कामांसाठी मोठ्या अडचणींचा सामना करावा लागत आहे.
हवामान विभागाने पुढील काही दिवस मुसळधार पावसाचा इशारा दिल्याने नागरिकांनी सतर्क राहून आवश्यक ती खबरदारी घ्यावी, असे आवाहन प्रशासनाकडून करण्यात आले आहे.
