रायगड | प्रतिनिधी
भारतीय हवामान विभागाने रायगड जिल्ह्यासाठी अतिमुसळधार पावसाचा रेड अलर्ट जारी केल्याच्या पार्श्वभूमीवर जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष किशन न. जावळे यांनी सोमवार, दिनांक ६ जुलै २०२६ रोजी जिल्ह्यातील सर्व शाळांना सुट्टी जाहीर केली आहे.
हवामान विभागाच्या अंदाजानुसार ५ आणि ६ जुलै २०२६ दरम्यान जिल्ह्यात काही ठिकाणी मुसळधार ते अतिमुसळधार, तर तुरळक ठिकाणी अत्यंत मुसळधार पावसाची शक्यता वर्तविण्यात आली आहे. नागरिक व विद्यार्थ्यांच्या सुरक्षिततेच्या दृष्टीने हा निर्णय घेण्यात आल्याचे प्रशासनाने स्पष्ट केले आहे.
या आदेशानुसार अंगणवाडी, प्राथमिक, माध्यमिक तसेच उच्च माध्यमिक शाळांना ६ जुलै रोजी सुट्टी राहणार आहे. मात्र मुख्याध्यापक, शिक्षक आणि शिक्षकेतर कर्मचाऱ्यांनी आवश्यकतेनुसार कार्यालयीन वेळेत उपस्थित राहून स्थानिक प्रशासनाच्या सूचनांनुसार आपत्ती व्यवस्थापनाची कामे करावीत, असे आदेशात नमूद करण्यात आले आहे.
दरम्यान, जिल्हा प्रशासनाने नागरिकांना अनावश्यक प्रवास टाळण्याचे, नदी-नाले आणि धोकादायक ठिकाणांपासून दूर राहण्याचे तसेच हवामान विभाग आणि प्रशासनाकडून वेळोवेळी दिल्या जाणाऱ्या सूचनांचे पालन करण्याचे आवाहन केले आहे.
