प्रतिनिधी :
मुंबई : मुंबई विद्यापीठाच्या अंतर्गत कार्यरत सर्व महाविद्यालयीन क्रीडा संचालकांची पाचवी कार्यशाळा श्री विठ्ठलराव जोशी धर्मदाय संस्था क्रीडा अकादमी, कासारवाडी सावर्डे, डेरवण (चिपळूण) येथे उत्साहात पार पडली. या कार्यशाळेत मुंबई विद्यापीठाचे कुलगुरू डॉ. रविंद्र कुलकर्णी यांनी “जागतिक दर्जाचे खेळाडू तयार करण्यासाठी विद्यापीठाकडून सर्वोतोपरी सहाय्य केले जाईल,” असे प्रतिपादन केले.
मुंबई विद्यापीठाचे कुलगुरू डॉ. रविंद्र कुलकर्णी, उपकुलगुरू डॉ. अजय भामरे यांच्या मार्गदर्शनाखाली तसेच मुंबई विद्यापीठाचे क्रीडा संचालक डॉ. मनोज रेड्डी आणि क्रीडा समिती सदस्य डॉ. चंद्रकांत म्हात्रे यांच्या नेतृत्वाखाली ही पाच दिवसीय कार्यशाळा आयोजित करण्यात आली होती. ३० जून ते ४ जुलै दरम्यान विविध क्षेत्रातील तज्ज्ञांचे मार्गदर्शनपर व्याख्यान आणि प्रात्यक्षिक सत्रांचे आयोजन करण्यात आले.
कार्यशाळेत हॉलीबॉल, अॅथलेटिक्स, बास्केटबॉल, बॅडमिंटन यांसारख्या क्रीडा प्रकारांचे प्रत्यक्ष प्रशिक्षण देण्यात आले. तसेच योगसाधना, खेळाडूंचे आरोग्य, फिटनेस, थेरपी आणि आधुनिक प्रशिक्षण पद्धतींबाबत सखोल मार्गदर्शन करण्यात आले. डॉ. रुपेश थोपटे यांनी योगसाधनेचे महत्त्व पटवून दिले, तर डॉ. मानसी साताळकर यांनी खेळाडूंच्या आरोग्य व फिटनेस संदर्भात मार्गदर्शन केले.
ऑनलाइन नोंदणी प्रक्रिया सुलभ करण्यासाठी संपूर्ण सॉफ्टवेअर प्रणालीची माहिती श्रीमती स्मिता मनोहर यांनी प्रात्यक्षिकासह दिली. याशिवाय श्री. सानंद मित्रा यांनी खेळाडू, प्रशिक्षक आणि क्रीडा संचालकांसाठी प्रभावी नियोजन आणि मार्गदर्शन पद्धतींबाबत माहिती दिली. डॉ. आनंद लुंकड यांनी महाविद्यालयीन परीक्षण आणि NAAC प्रक्रियेतील गुणदान पद्धतीवर सविस्तर भाष्य केले.
कार्यशाळेदरम्यान आयोजित ओपन फोरममध्ये क्रीडा स्पर्धांमधील विविध अडचणी, खासगी असोसिएशनकडून होणाऱ्या गैरसोयी, तसेच खेळाडूंच्या सहभागासंदर्भातील नियमांवर चर्चा करण्यात आली. क्रीडा संचालक उपस्थित नसल्यास खेळाडूंना स्पर्धेत सहभागी होता येणार नाही तसेच गैरवर्तन झाल्यास संबंधित महाविद्यालय व क्रीडा संचालकांवर कारवाई करण्यात येईल, असेही ठरविण्यात आले.
समारोप प्रसंगी विविध क्रीडा संचालकांनी आपले अनुभव व मते व्यक्त केली. डॉ. मनोज रेड्डी यांनी कार्यशाळेत मांडण्यात आलेल्या योग्य सूचनांची दखल घेत पुढील नियोजन करण्यात येईल, असे आश्वासन दिले.
कार्यशाळा यशस्वी करण्यासाठी डॉ. आदित्य कुलकर्णी, प्रा. रोहिणी डोंबे, प्रा. राहुल अकुल, प्रा. गणेश मोरे, प्रा. शशांक उपशेटे, प्रा. मंदार कुलकर्णी, डॉ. मनोज वर्मा, प्रा. उमेश सोनवणे, डॉ. चंद्रकांत नाईक, रवी वर्मा, डॉ. यज्ञेश्वर बारगाव आदींनी विशेष परिश्रम घेतले.
यावेळी राष्ट्रीय रस्ता सुरक्षा अभियानाचे विभागीय नोडल अधिकारी डॉ. मनिलाल शिंपी यांनी वाहतूक जनजागृतीचे महत्त्व पटवून देत शिक्षकांनी समाजात ट्रॅफिक अवेअरनेस निर्माण करण्यासाठी पुढाकार घ्यावा, असे आवाहन केले.
दरम्यान, सन २०२६-२७ साठी डॉ. मनोज वर्मा, डॉ. दिपाली पाटील, प्रा. गणेश मोरे आणि प्रा. सुशांक उपशेटे यांची झोन सचिव म्हणून निवड करण्यात आली.
कार्यक्रमाच्या समारोपावेळी सर्व मान्यवरांनी कार्यशाळेच्या यशस्वी आयोजनाबद्दल समाधान व्यक्त करत क्रीडा क्षेत्राच्या विकासासाठी अशा उपक्रमांची आवश्यकता अधोरेखित केली.
