भोर | प्रतिनिधी
भोर तालुक्यात १९९२ पासून प्रलंबित असलेल्या उत्रौली-वडगाव एमआयडीसी प्रकल्पाला गती देण्यासाठी विधानभवनात राज्याच्या उपमुख्यमंत्री तथा पुणे जिल्ह्याच्या पालकमंत्री सुनेत्रा पवार यांच्या अध्यक्षतेखाली महत्त्वपूर्ण बैठक पार पडली. या बैठकीत प्रकल्प लवकर मार्गी लावण्यासाठी प्रशासनाला विविध निर्देश देण्यात आले.
बैठकीत भोर एमआयडीसीसाठी तातडीने नवीन प्रस्ताव तयार करून नव्याने अधिसूचना (नोटिफिकेशन) जारी करण्याचे निर्देश देण्यात आले. तसेच शेतकऱ्यांना योग्य व सुधारित मोबदला मिळावा यासाठी जमिनीचे नवीन दर निश्चित करून स्थानिक शेतकऱ्यांशी सविस्तर चर्चा करण्याचे आदेशही देण्यात आले. प्रकल्पाच्या माध्यमातून भोर तालुक्यातील स्थानिक युवकांना रोजगाराच्या संधी उपलब्ध करून देण्यासाठी आवश्यक त्या सर्व उपाययोजना युद्धपातळीवर राबविण्याच्या सूचनाही प्रशासनाला देण्यात आल्या.
या बैठकीस एमआयडीसीचे मुख्य कार्यकारी अधिकारी दिपेंद्र सिंह कुशवाह, प्रधान सचिव राजेश देशमुख, जिल्हाधिकारी जितेंद्र डुडी, पुणे जिल्हा परिषदेचे मुख्य कार्यकारी अधिकारी गजानन पाटील तसेच संबंधित विभागांचे वरिष्ठ अधिकारी उपस्थित होते.
यावेळी पुणे जिल्हा परिषदेचे माजी उपाध्यक्ष रणजित शिवतरे, भोर नगराध्यक्ष रामचंद्र (नाना) आवारे, पंचायत समिती सभापती मनीषाताई कंक, जिल्हा परिषद सदस्य प्रवीण जगदाळे व विक्रम खुटवड, राष्ट्रवादी काँग्रेसचे तालुकाध्यक्ष संतोष घोरपडे, पुणे जिल्हा मध्यवर्ती सहकारी बँकेचे संचालक भालचंद्र जगताप, पंचायत समिती उपसभापती विशाल कोंडे, माजी जिल्हा परिषद सदस्य चंद्रकांत बाठे तसेच नगरसेवक केदार देशपांडे, कृणाल धुमाळ आणि अनिल भेलके यांच्यासह अनेक लोकप्रतिनिधी उपस्थित होते.
या बैठकीमुळे दीर्घकाळ प्रलंबित असलेल्या उत्रौली-वडगाव एमआयडीसी प्रकल्पाच्या कामांना वेग मिळण्याची अपेक्षा व्यक्त होत असून, प्रकल्प साकार झाल्यास भोर तालुक्यात औद्योगिक विकासाला चालना मिळून स्थानिक युवकांसाठी मोठ्या प्रमाणावर रोजगाराच्या संधी निर्माण होणार असल्याचे सांगितले जात आहे.
