सावली | प्रतिनिधी
देवळी-पुलगाव विधानसभा मतदारसंघाचे आमदार राजेश बकाने यांच्या आमदार स्थानिक विकास निधीतून सावली गावातील सिमेंट रस्त्याच्या बांधकामाला प्रारंभ झाला आहे. या कामामुळे गावातील नागरिकांमध्ये समाधानाचे वातावरण असून त्यांनी आमदारांचे आभार व्यक्त केले आहेत.
या निधीतून वासुदेव सिद यांच्या घरापासून ते विठ्ठल बोरकर यांच्या घरापर्यंत सिमेंट रस्त्याचे बांधकाम मंजूर करण्यात आले असून प्रत्यक्ष कामाला सुरुवात झाली आहे.
या मार्गावर अनेक दिवसांपासून मोठमोठे खड्डे पडले होते. विशेषतः पावसाळ्यात रस्त्यावर पाणी साचत असल्याने पादचारी, वाहनचालक तसेच ग्रामस्थांना मोठ्या अडचणींचा सामना करावा लागत होता. आता सिमेंट रस्त्याचे काम सुरू झाल्याने नागरिकांची दीर्घकाळाची मागणी पूर्ण होत असून वाहतुकीची सुविधा अधिक सुरक्षित व सुलभ होणार आहे.
रस्त्याच्या कामाला प्रारंभ झाल्याबद्दल गावकऱ्यांनी आमदार राजेश बकाने यांचे आभार मानत विकासकामांबाबत समाधान व्यक्त केले.
