निफाड | प्रतिनिधी
भारत निवडणूक आयोगाच्या विशेष सखोल पुनरीक्षण (SIR-2026) अभियानांतर्गत नाशिक जिल्ह्यातील सर्व मतदान केंद्रांवर १०, ११ आणि १२ जुलै २०२६ (शुक्रवार, शनिवार आणि रविवार) या तीन दिवसांत विशेष शिबिरांचे आयोजन करण्यात आले आहे. या अभियानाअंतर्गत मतदारांनी Enumeration Form भरून मतदार यादीतील माहिती अद्ययावत करण्याचे आवाहन प्रशासनाने केले आहे.
या विशेष शिबिरांदरम्यान संबंधित बूथ लेव्हल ऑफिसर (BLO) आणि पर्यवेक्षक दिवसभर उपस्थित राहून मतदारांना मार्गदर्शन तसेच आवश्यक मदत करतील.
मतदारांना घरबसल्या voters.eci.gov.in या संकेतस्थळावर किंवा ECINET App च्या माध्यमातून Self Enumeration करण्याची सुविधाही उपलब्ध करून देण्यात आली आहे.
ऑनलाइन प्रक्रिया करणे शक्य नसल्यास नागरिकांनी आपल्या मतदान केंद्रावरील विशेष शिबिरात उपस्थित राहून Enumeration Form भरावा, असे आवाहन प्रशासनाने केले आहे.
नाशिक जिल्ह्यात अनेक मतदार नोकरी, शिक्षण किंवा इतर कारणांमुळे आपल्या मूळ गावापासून दूर राहत असल्याने त्यांनी BLO घरी येण्याची प्रतीक्षा न करता स्वतःहून ऑनलाइन किंवा विशेष शिबिरामध्ये सहभागी होऊन मतदार यादीतील माहिती अद्ययावत करावी, असेही प्रशासनाने स्पष्ट केले आहे.
या अभियानात सर्व मान्यताप्राप्त राजकीय पक्षांचे प्रतिनिधी, Booth Level Agents (BLA), सामाजिक संस्था, गृहनिर्माण संस्था, युवक मंडळे आणि स्वयंसेवी संस्थांनी सक्रिय सहभाग घेऊन मतदारांना सहकार्य करावे, असे आवाहन जिल्हा प्रशासनाने केले आहे.
