नाशिक | प्रतिनिधी :
नाशिक रोड रेल्वे स्थानकावर प्रवाशाच्या हातातील मोबाईल हिसकावून पळालेल्या दोन संशयितांना रेल्वे पोलिसांनी अवघ्या सहा तासांत अटक करून चोरीस गेलेला मोबाईल हस्तगत केला आहे.
गुरुवार (दि. ९ जुलै) रोजी फिर्यादी मध्य प्रदेशला जाण्यासाठी नाशिक रोड रेल्वे स्थानकावरील प्लॅटफॉर्मवर बसले होते. त्यावेळी दोन संशयित त्यांच्या जवळ आले. “कुठे चालला आहेस?” अशी विचारणा करत त्यांनी फिर्यादीला दमदाटी केली आणि त्यांच्या हातातील मोबाईल हिसकावून घटनास्थळावरून पळ काढला.
घटनेची माहिती मिळताच सहाय्यक फौजदार संतोष उफाडे, पोलीस हवालदार शैलेश पाटील आणि रेल्वे सुरक्षा बलाचे आरक्षक सागर वर्मा यांनी स्थानक परिसरातील सीसीटीव्ही फुटेजची तपासणी केली. फुटेजच्या आधारे संशयितांचा माग काढत पोलिसांनी ईश्वर रमेश इंगळे (वय ३५) आणि संजय विजय इंगळे (वय २८, दोघेही रा. निमकर्दा, ता. बाळापूर, जि. अकोला) यांना ताब्यात घेतले.
चौकशीदरम्यान दोन्ही संशयितांनी गुन्ह्याची कबुली दिली असून, त्यांच्या ताब्यातून चोरीस गेलेला मोबाईल जप्त करण्यात आला आहे. या प्रकरणाचा पुढील तपास रेल्वे पोलीस करत आहेत.
