कडेगाव | प्रतिनिधी
सभासदांचे आर्थिक आणि सामाजिक हित जपण्याच्या उद्देशाने कार्यरत असलेल्या कडेपूर सर्व सेवा सहकारी सोसायटीने सहकार क्षेत्रात एक अभिनव उपक्रम राबवत ‘आ. संपतराव देशमुख शेतकरी कन्यादान योजना’ सुरू केली आहे. या योजनेअंतर्गत नियमित कर्जफेड करणाऱ्या पात्र शेतकरी सभासदांच्या मुलीच्या विवाहासाठी संस्थेतर्फे ₹१० हजारांची आर्थिक मदत देण्यात येणार असून या निर्णयाचे परिसरातून स्वागत होत आहे.
शेतकरी कुटुंबांसाठी मुलीचा विवाह हा मोठा आर्थिक भार असतो. अशा परिस्थितीत संस्थेकडून मिळणारी आर्थिक मदत दिलासादायक ठरणार असून, या योजनेमुळे गरजू शेतकऱ्यांना आधार मिळण्याबरोबरच नियमित कर्जफेडीलाही प्रोत्साहन मिळणार आहे.
संस्थेचे मार्गदर्शक माजी आमदार संपतराव देशमुख यांच्या स्मरणार्थ सुरू करण्यात आलेली ही योजना माजी आमदार पृथ्वीराज देशमुख (बाबा), माजी जिल्हा परिषद अध्यक्ष संग्रामसिंह देशमुख आणि कडेपूरचे लोकनियुक्त सरपंच सतीश देशमुख यांच्या मार्गदर्शनाखाली राबविण्यात येत आहे.
सोसायटीचे चेअरमन धन्यकुमार यादव आणि उपाध्यक्ष शंकर यादव यांच्या नेतृत्वाखाली संस्था आर्थिक व्यवहारांसोबतच सामाजिक बांधिलकी जपत विविध कल्याणकारी उपक्रम राबवत असल्याचे यानिमित्ताने अधोरेखित झाले.
नियमित कर्जफेड करणाऱ्या सभासदांचा सन्मान करणारी ही योजना इतर सहकारी संस्थांसाठीही प्रेरणादायी ठरेल, अशी भावना उपस्थितांनी व्यक्त केली. कार्यक्रमाच्या शेवटी संस्थेचे सचिव वैभव देसाई यांनी उपस्थितांचे आभार मानले.
