पनवेल | प्रतिनिधी
पनवेल येथील रॉयल गार्डन बँक्वेट हॉल येथे आमदार विक्रांत बाळासाहेब पाटील यांच्या अभिष्टचिंतन सोहळ्याचे आयोजन उत्साहात करण्यात आले. महाराष्ट्राचे महसूलमंत्री चंद्रशेखर बावनकुळे यांच्या प्रमुख उपस्थितीत पार पडलेल्या या सोहळ्याला विविध क्षेत्रांतील मान्यवर, लोकप्रतिनिधी, कार्यकर्ते आणि नागरिकांची मोठ्या संख्येने उपस्थिती लाभली.
या कार्यक्रमाला आमदार योगेश टिळेकर, आमदार धैर्यशील कदम, अण्णासाहेब पाटील आर्थिक विकास महामंडळाचे अध्यक्ष नरेंद्र पाटील यांच्यासह अनेक मान्यवर उपस्थित होते.
यावेळी आमदार विक्रांत पाटील यांनी आपल्या मनोगतात सांगितले की, गेली अनेक वर्षे सामाजिक आणि राजकीय क्षेत्रात कार्य करत असताना पनवेलमधील नागरिक, मातृशक्ती, युवाशक्ती आणि राज्यभरातील सहकाऱ्यांनी दिलेला विश्वास, प्रेम आणि साथ हीच लोकहितासाठी अखंड कार्य करण्याची खरी प्रेरणा आहे. जनतेने दाखविलेला विश्वास ही आपली जबाबदारी अधिक वाढवत असून, समाजाच्या सर्वांगीण विकासासाठी अधिक जोमाने कार्य करण्याची ऊर्जा मिळत असल्याचे त्यांनी नमूद केले.
अभिष्टचिंतन सोहळ्याच्या निमित्ताने महसूलमंत्री चंद्रशेखर बावनकुळे यांच्या हस्ते नागरिकांना विविध लोकोपयोगी वस्तूंचे वितरण करण्यात आले. यामध्ये सायकली, शिलाई मशीन, फूड प्रोसेसर, आटा चक्की, भात पेरणी यंत्र, छत्र्या, स्पीकर्स, महिलांसाठी साड्या, ग्लुकोमीटर, रेनकोट, सीएनजी कूपन तसेच आयुष्मान भारत कार्ड यांचा समावेश होता. शासनाच्या विविध योजनांचा लाभ समाजातील प्रत्येक घटकापर्यंत पोहोचविण्याच्या उद्देशाने हा उपक्रम राबविण्यात आला.
कार्यक्रमाच्या शेवटी आमदार विक्रांत पाटील यांनी उपस्थित मान्यवर, पक्षाचे वरिष्ठ नेते, कार्यकर्ते, हितचिंतक आणि पनवेलकर नागरिकांचे आभार मानले. नागरिकांनी व्यक्त केलेला विश्वास कायम सार्थ ठरेल आणि पनवेलच्या सर्वांगीण विकासासाठी प्रामाणिकपणे व समर्पित भावनेने कार्य सुरू ठेवू, अशी ग्वाही त्यांनी दिली.
या प्रसंगी रायगडचे जिल्हाधिकारी, प्रांताधिकारी, पनवेलच्या तहसीलदार, शिवसेना जिल्हाप्रमुख तथा नगरसेवक रामदास शेवाळे, पनवेलचे माजी नगराध्यक्ष जे. एम. म्हात्रे तसेच विविध क्षेत्रांतील मान्यवर आणि नागरिक मोठ्या संख्येने उपस्थित होते.
