पिंपरी-चिंचवड | प्रतिनिधी
पिंपरी-चिंचवडमधील नायर कॉलनी परिसरातील जरे हाइट्स आणि विनीत हाइट्स येथे मध्यरात्री झालेल्या घरफोडीच्या घटनेनंतर परिसरात भीतीचे वातावरण निर्माण झाले आहे. या पार्श्वभूमीवर सामाजिक कार्यकर्ते अमोल तिरमारे यांनी नागरिकांना सतर्क राहण्याचे आवाहन केले आहे.
अमोल तिरमारे यांनी सांगितले की, परिसरात गुन्हेगारीच्या घटना वाढत असल्याचे दिसून येत असून नागरिकांनी विशेषतः रात्रीच्या वेळी अधिक सावधगिरी बाळगावी. कोणतीही संशयास्पद व्यक्ती किंवा हालचाल आढळल्यास तात्काळ शेजाऱ्यांना माहिती देऊन पोलिसांशी संपर्क साधावा, असे त्यांनी आवाहन केले.
तसेच नागरिकांनी घरांचे मुख्य गेट, सेफ्टी डोअर आणि सीसीटीव्ही यंत्रणा व्यवस्थित कार्यरत असल्याची खात्री करून घ्यावी. परिसरातील रहिवाशांनी परस्पर समन्वय ठेवून सुरक्षिततेसाठी जागरूक राहणे आवश्यक असल्याचे त्यांनी नमूद केले.
यावेळी त्यांनी पोलिस प्रशासनाकडेही मोरे वस्ती, नायर कॉलनी आणि परिसरात रात्रीची गस्त वाढविण्याची मागणी केली. नियमित पोलिस गस्त वाढल्यास नागरिकांमध्ये सुरक्षिततेची भावना निर्माण होईल आणि गुन्हेगारीवर आळा बसण्यास मदत होईल, असे त्यांनी सांगितले.
नागरिकांनी कोणतीही संशयास्पद हालचाल आढळल्यास तात्काळ आपत्कालीन क्रमांक ११२ वर संपर्क साधावा तसेच स्थानिक पोलीस ठाण्याला माहिती द्यावी, असे आवाहन करण्यात आले आहे.
दरम्यान, या घटनेनंतर परिसरातील नागरिकांनी वाढत्या चोरी व घरफोडीच्या घटनांबाबत चिंता व्यक्त करत पोलिस प्रशासनाने तातडीने प्रभावी उपाययोजना कराव्यात, अशी मागणी केली आहे.
