पिंपोडे (प्रतिनिधी)
आषाढी वारीचे औचित्य साधत पिंपोडे सायकल क्लबच्या वतीने सहा सायकलपटूंनी शनिवारी पहाटे पिंपोडे-कोरेगाव येथून श्रीक्षेत्र पंढरपूरकडे सायकल वारीस उत्साहात प्रस्थान केले.
या सायकल वारीत सहभागी झालेले सायकलपटू ११ जुलै रोजी कोरेगाव ते पंढरपूर हा प्रवास पूर्ण करणार असून, १२ जुलै रोजी पंढरपूर येथे आयोजित ‘सायकलिंग गोल रिंगण’ सोहळ्यात सहभागी होणार आहेत. या सोहळ्यासाठी राज्यभरातील विविध सायकलिंग क्लबचे हजारो सायकलपटू उपस्थित राहणार आहेत.
पिंपोडे सायकल क्लब गेल्या काही वर्षांपासून ज्येष्ठ मार्गदर्शक संजय महाजन यांच्या मार्गदर्शनाखाली सामाजिक बांधिलकी जपत विविध उपक्रम राबवत आहे. सायकलिंगच्या माध्यमातून आरोग्य संवर्धन, पर्यावरण संरक्षण आणि वाहतूक शिस्तीबाबत जनजागृती करण्याचे महत्त्वपूर्ण कार्य क्लब सातत्याने करत आहे.
क्लबच्या या प्रेरणादायी उपक्रमाचे परिसरातील नागरिकांकडून कौतुक होत असून, अशा उपक्रमांमुळे निरोगी जीवनशैलीसह सामाजिक जनजागृतीला चालना मिळत असल्याची भावना व्यक्त करण्यात येत आहे.
