नाशिक | प्रतिनिधी
सकल मराठा परिवार फाउंडेशन आणि राम राज ग्लोबल कॉलेज यांच्या संयुक्त विद्यमाने, ‘उन्नत नाशिक अभियान’ अंतर्गत ‘झाडांची भिशी – जुलै २०२६’ या उपक्रमाचे आयोजन १० जुलै रोजी हिंदुस्थान नगर, आडगाव येथील राम राज ग्लोबल कॉलेजमध्ये उत्साहात करण्यात आले.
उपक्रमाची सुरुवात वृक्षपूजनाने करण्यात आली. तसेच नाशिकचे ‘ट्रीमॅन’ म्हणून ओळखले जाणारे व महाराष्ट्र शासनाचा छत्रपती शिवाजी महाराज वनश्री पुरस्कार जाहीर झालेले शेखर गायकवाड यांचा सकल मराठा परिवार आणि राम राज ग्लोबल कॉलेजच्या वतीने सत्कार करण्यात आला.
यावेळी शेखर गायकवाड आणि राम खुर्दळ यांनी योग्य पद्धतीने वृक्षारोपण, योग्य प्रजातींची निवड आणि वृक्षसंवर्धनाचे महत्त्व याबाबत मार्गदर्शन केले. सकल मराठा परिवाराचे खंडू आहेर यांनी महाराष्ट्रभर राबविण्यात येणाऱ्या सामाजिक, शैक्षणिक आणि पर्यावरणपूरक उपक्रमांची माहिती देत समाजहितासाठी सर्वांनी एकत्रितपणे कार्य करण्याचे आवाहन केले.
राम राज ग्लोबल कॉलेजचे रामकृष्ण घायाळ आणि हर्षदा घायाळ यांनी महाविद्यालयाच्या विविध उपक्रमांची माहिती देत या अभियानाला पूर्ण सहकार्याची ग्वाही दिली.
या उपक्रमात महाविद्यालयातील विद्यार्थी-विद्यार्थिनींनी उत्स्फूर्त सहभाग नोंदवत १५० हून अधिक वृक्षांची लागवड केली आणि पर्यावरण संवर्धनाचा संदेश दिला.
कार्यक्रमास शिवाजी धोंडगे (दारिमाता वृक्षमित्र परिवार), शिंदे सर, खंडू आहेर, प्रकाश बोराडे, डॉ. नितीन देशमुख, प्रवीण देशमुख, संजय काळे, ॲड. गौरव मोहिते, स्नेहलताई काळे, संजय झारोळे, धनाजी आगळे, चेतन लोखंडे, कैलास देशमुख, दिलीप साबळे, प्रमोद सूर्यवंशी, संकेत कोरडे, मनोज साठे, स्वप्नील भोकरे, धोंडीराम रायते, भूषण औटे, सनी शेवाळे यांच्यासह सकल मराठा परिवार आणि ‘झाडांची भिशी’ समूहाचे सदस्य उपस्थित होते.
महाविद्यालयातील शिक्षक, शिक्षकेतर कर्मचारी आणि व्यवस्थापनाच्या सहकार्यामुळे हा उपक्रम यशस्वीरीत्या पार पडला. “हिरवेगार नाशिक घडविण्याचा आमचा संकल्प अविरत सुरू राहील,” असा निर्धार यावेळी आयोजकांनी व्यक्त केला.
