ब्रह्मपुरी | प्रतिनिधी :
महाराष्ट्र राज्य परीक्षा परिषद, पुणे यांच्या वतीने घेण्यात आलेल्या पूर्व उच्च प्राथमिक शिष्यवृत्ती परीक्षा–2026 च्या नुकत्याच जाहीर झालेल्या निकालात जिल्हा परिषद उच्च प्राथमिक शाळा, मेंडकी येथील इयत्ता पाचवीची विद्यार्थिनी कु. नयन प्रभाकर जनबंधू हिने 78.66 टक्के गुण मिळवत ब्रह्मपुरी तालुक्यात प्रथम क्रमांकाची शिष्यवृत्तीधारक होण्याचा मान पटकावला आहे. या उल्लेखनीय यशामुळे जिल्हा परिषद उच्च प्राथमिक शाळा, मेंडकीच्या शिरपेचात मानाचा तुरा रोवला गेला आहे.
विशेष म्हणजे, नयनची यावर्षी जवाहर नवोदय विद्यालयातही निवड झाली असून शिष्यवृत्ती परीक्षा आणि नवोदय प्रवेश या दोन्ही क्षेत्रांत तिने मिळविलेल्या यशामुळे शाळा, पालक आणि गावाचे नाव उज्ज्वल केले आहे.
या यशामागे विद्यार्थिनीची जिद्द, सातत्यपूर्ण अभ्यास, पालकांचे प्रोत्साहन आणि शिक्षकांचे मोलाचे मार्गदर्शन असल्याची भावना व्यक्त करण्यात आली. तिच्या यशाबद्दल शाळा व्यवस्थापन समिती, मुख्याध्यापक श्री. पाडवे, शिक्षक श्री. पेंदाम, श्री. पठाण, कु. शहारे, श्री. घोडमारे, श्री. धकाते, श्री. दारोकर, श्री. उरकुडे, कु. मेंढे, श्री. कुंभलकर, श्री. कावरे आणि श्री. कायरकर यांनी तिचे अभिनंदन करून पुढील शैक्षणिक वाटचालीसाठी शुभेच्छा दिल्या.
कु. नयनच्या या यशामुळे मेंडकी गावात आनंदाचे वातावरण निर्माण झाले असून ग्रामस्थांकडून तिच्यावर अभिनंदनाचा वर्षाव होत आहे. तिच्या यशातून इतर विद्यार्थ्यांनाही प्रेरणा मिळेल, असा विश्वास नागरिकांनी व्यक्त केला आहे.
