जुन्नर | प्रतिनिधी :
जुन्नर तालुक्यातील माणिकडोह धरणात मासेमारीसाठी गेलेल्या हडसर येथील एका ५९ वर्षीय मच्छीमाराचा पाण्यात बुडून मृत्यू झाल्याची दुर्दैवी घटना घडली. काळू कृष्णा सांगडे (वय ५९) असे मृत व्यक्तीचे नाव आहे.
मिळालेल्या माहितीनुसार, काळू सांगडे हे गुरुवारी (दि. ९ जुलै) सायंकाळी त्यांचे सहकारी युवराज सांगडे यांच्यासोबत मासेमारीसाठी धरणात गेले होते. जाळे टाकण्यासाठी ते पाण्यात उतरले असता काही वेळातच ते बेपत्ता झाले. पाण्यावर केवळ त्यांनी वापरलेली टायर ट्यूब तरंगताना दिसल्याने युवराज सांगडे यांनी तातडीने ग्रामस्थांना माहिती दिली.
घटनेची माहिती मिळताच जुन्नर पोलीस ठाण्याचे पोलीस निरीक्षक दत्तात्रय गुंड यांच्या मार्गदर्शनाखाली पोलिस, स्थानिक ग्रामस्थ आणि रेस्क्यू पथकाने शोधमोहीम सुरू केली. शुक्रवारी सकाळी सुमारे ११ वाजण्याच्या सुमारास शोधमोहीमेदरम्यान काळू सांगडे यांचा मृतदेह धरणातून बाहेर काढण्यात आला.
या घटनेमुळे हडसर परिसरात शोककळा पसरली असून, पुढील तपास जुन्नर पोलीस करत आहेत.
