पुणे | प्रतिनिधी :
आषाढी वारीनिमित्त वारकऱ्यांच्या आरोग्याची काळजी घेण्याच्या उद्देशाने ऑरा मल्टीस्पेशालिटी हॉस्पिटलचे संस्थापक डॉ. बालाजी कल्याणे यांच्या मार्गदर्शनाखाली भव्य मोफत आरोग्य तपासणी शिबिराचे आयोजन करण्यात आले. ऑरा मल्टीस्पेशालिटी हॉस्पिटल, अखिल मंडई मंडळ, पुणे, शेतमाल व्यापारी संघटना, फळ मार्केट मंडई, पुणे तसेच युवा क्रांती फाउंडेशन अंतर्गत पोलीस मित्र संघटना यांच्या संयुक्त विद्यमाने शुक्रवार, १० जुलै २०२६ रोजी हा सेवा उपक्रम यशस्वीरित्या पार पडला.
गेल्या दशकभरापासून आषाढी वारीदरम्यान वारकऱ्यांसाठी सातत्याने आरोग्यसेवा उपलब्ध करून देणाऱ्या ऑरा मल्टीस्पेशालिटी हॉस्पिटलने यंदाही सेवाभावाची परंपरा कायम राखली. सकाळी १० ते दुपारी ४ या वेळेत झालेल्या शिबिरात नेत्र, दंत, रक्तदाब, रक्तातील साखर आणि हिमोग्लोबिन तपासणी, तज्ज्ञांचा वैद्यकीय सल्ला तसेच मोफत औषधांचे वितरण करण्यात आले. या उपक्रमाचा लाभ २,५७० वारकरी भाविकांनी घेतला.
कार्यक्रमादरम्यान श्री. किशनराव कल्याणे यांचा वाढदिवस वारकऱ्यांच्या उपस्थितीत उत्साहात साजरा करण्यात आला. हरिपाठ, भैरवी गवळण तसेच टाळ-मृदंगाच्या गजराने परिसर भक्तिमय वातावरणाने दुमदुमून गेला.
यावेळी मनोगत व्यक्त करताना श्री. किशनराव कल्याणे म्हणाले, “वारकऱ्यांच्या सहवासात साजरा झालेला हा वाढदिवस माझ्यासाठी आयुष्यभर स्मरणात राहणारा आणि प्रेरणादायी क्षण आहे.”
ऑरा मल्टीस्पेशालिटी हॉस्पिटलचे जनसंपर्क अधिकारी अनिल रेळेकर यांनी उपस्थितांचे आभार मानताना वारकरी सेवेशी असलेले संस्थेचे नाते अधिक दृढ करण्याचा संकल्प व्यक्त केला. तसेच श्री. किशनराव कल्याणे यांच्या उत्तम आरोग्य व दीर्घायुष्यासाठी शुभेच्छा दिल्या.
या उपक्रमाचे नियोजन योगेश कल्याणे तसेच ऑरा मल्टीस्पेशालिटी हॉस्पिटलचे डॉक्टर, परिचारिका, कर्मचारी आणि स्वयंसेवक यांनी प्रभावीपणे केले. कै. सतीश धोंडीबा मिसाळ पार्किंग येथे आयोजित या शिबिरातून वारकऱ्यांना आवश्यक वैद्यकीय सुविधा उपलब्ध करून देण्यात आल्या. भविष्यातही वारकऱ्यांच्या सेवेसाठी अशाच सामाजिक आणि आरोग्यविषयक उपक्रमांचे सातत्याने आयोजन करण्यात येईल, असा निर्धार आयोजकांनी व्यक्त केला.
