शेगाव | प्रतिनिधी
ओम साई प्रतिष्ठान, शेगाव यांच्या वतीने राबविण्यात येणारी “विद्यार्थी दत्तक योजना – वर्ष तिसरे” हा उपक्रम उत्साहपूर्ण वातावरणात पार पडला. या उपक्रमांतर्गत गावातील २५ गरजू व आर्थिकदृष्ट्या दुर्बल विद्यार्थ्यांना शालेय साहित्याचे वाटप करून त्यांच्या शिक्षणाला हातभार लावण्यात आला.
कार्यक्रमाच्या अध्यक्षस्थानी जिल्हा परिषद सदस्य डॉ. शिवाजी खिलारे होते. प्रमुख पाहुणे म्हणून सामाजिक कार्यकर्ते विक्रम भैया ढोणे, डॉ. संभाजी देशमुख, शेगाव सर्व सेवा सोसायटीचे चेअरमन धोंडीराम गुंडा माने, शालेय व्यवस्थापन समितीचे अध्यक्ष संभाजी शिंदे, उपाध्यक्ष अनुराधा निकम, सुभेदार मेजर शिवाजी बोराडे, केंद्रप्रमुख शेंडे सर, मुख्याध्यापक कुलकर्णी सर, नवनाथ निकम, विशाल माने आणि धनाजी पाटील यांच्यासह अनेक मान्यवर उपस्थित होते.
कार्यक्रमाच्या प्रारंभी मान्यवरांच्या हस्ते विद्यार्थ्यांना शालेय साहित्याचे वितरण करण्यात आले. यावेळी ओम साई प्रतिष्ठानचे संचालक, महिला कार्यकारिणी सदस्य, शिक्षकवृंद, विद्यार्थी, पालक आणि ग्रामस्थ मोठ्या संख्येने उपस्थित होते.
उपस्थित मान्यवरांनी विद्यार्थ्यांना शिक्षणाचे महत्त्व पटवून देत जिद्द, चिकाटी आणि कठोर परिश्रमाच्या बळावर यश संपादन करण्याचे आवाहन केले. तसेच ओम साई प्रतिष्ठानच्या सामाजिक, शैक्षणिक आणि जनहिताच्या विविध उपक्रमांचे कौतुक करत संस्थेच्या भावी वाटचालीस शुभेच्छा दिल्या.
संस्थेचे अध्यक्ष बबलू शिंदे यांनी सांगितले की, समाजातील दानशूर व्यक्ती, देणगीदार आणि हितचिंतकांच्या सहकार्यामुळे हा उपक्रम यशस्वी झाला असून, गरजू विद्यार्थ्यांच्या शैक्षणिक प्रगतीसाठी भविष्यातही अशा समाजोपयोगी योजना सातत्याने राबविण्यात येतील.
कार्यक्रमाच्या यशस्वी आयोजनासाठी सहकार्य करणाऱ्या सर्व मान्यवर, देणगीदार, पालक, शिक्षकवृंद आणि ग्रामस्थांचे ओम साई प्रतिष्ठानच्या वतीने मनःपूर्वक आभार मानण्यात आले.
