शेगाव (जत) | प्रतिनिधी
राष्ट्रीय महामार्ग NH-965G वर झालेल्या भीषण अपघातात शेगाव येथील राहुल शिंदे यांचा दुर्दैवी मृत्यू झाल्यानंतर ग्रामस्थांचा संताप अनावर झाला. या घटनेच्या निषेधार्थ ओम साई प्रतिष्ठान, शेगाव आणि शिवसेना, जत तालुका यांच्या नेतृत्वाखाली शेकडो नागरिकांनी महामार्गावर रस्ता रोको आंदोलन केले. या आंदोलनामुळे महामार्गावरील वाहतूक सुमारे दोन ते तीन तास पूर्णपणे ठप्प झाली.
ग्रामस्थांनी अपघातप्रवण ठिकाणी तातडीने सुरक्षेच्या उपाययोजना करण्याची मागणी करत, ठोस निर्णय होईपर्यंत आंदोलन मागे न घेण्याची भूमिका घेतली.
घटनेचे गांभीर्य लक्षात घेऊन राष्ट्रीय महामार्ग विभागाचे अभियंता खालीद सलीम शेख तसेच पोलीस प्रशासनाने आंदोलनस्थळी धाव घेत आंदोलकांशी चर्चा केली. यावेळी माननीय प्रांत अधिकाऱ्यांनीही दूरध्वनीद्वारे संबंधित यंत्रणेला आवश्यक निर्देश दिले.
चर्चेनंतर महामार्ग विभागाने अपघातप्रवण ठिकाणी येत्या आठ दिवसांत गतिरोधक (स्पीड ब्रेकर) उभारण्याचे लेखी आश्वासन दिले. तसेच सुरक्षेच्या इतर उपाययोजनाही तातडीने राबविण्यात येतील, असे प्रशासनाने स्पष्ट केले.
प्रशासनाच्या आश्वासनानंतर ग्रामस्थांनी आंदोलन मागे घेतले. मात्र, दिलेल्या मुदतीत काम पूर्ण झाले नाही तर पुन्हा तीव्र आंदोलन छेडण्यात येईल, असा इशाराही आंदोलकांनी दिला आहे.
राहुल शिंदे यांच्या निधनामुळे शेगाव परिसरात शोककळा पसरली असून, भविष्यात अशा दुर्घटना टाळण्यासाठी महामार्गावर कायमस्वरूपी सुरक्षा उपाययोजना करण्याची मागणी नागरिकांकडून होत आहे.
