पेण | प्रतिनिधी
पेण तालुक्यातील शासकीय माध्यमिक आश्रम शाळा, वरवणे येथे तांबटी-खोपोली येथील गोदरेज कंपनीच्या पाच कर्मचाऱ्यांनी व त्यांच्या कुटुंबीयांनी सामाजिक बांधिलकी जपत विद्यार्थ्यांसाठी वाचनालयात उपयुक्त पुस्तकांची भेट दिली. तसेच शालेय परिसरात वृक्षारोपणाचा उपक्रमही उत्साहात पार पडला.
दि. १८ जुलै २०२६ रोजी आयोजित कार्यक्रमात विद्यार्थ्यांच्या वाचन संस्कृतीला चालना मिळावी या उद्देशाने विविध उपयुक्त पुस्तके शाळेला देण्यात आली. त्यानंतर शाळेच्या परिसरात फणस, आंबा, शेवगा, पेरू आदी उपयुक्त वृक्षांची लागवड करण्यात आली.
या उपक्रमात हरप्रीत कौर, विक्रम भुई, अश्विनी देव देशमुख, प्रफुल्ल मोरे, स्नेहल मोरे, तानाजी चव्हाण, पार्वती चव्हाण, सोमेश खिन्नची, स्नेहा खिन्नची, प्रियांका जाधव आणि स्वप्निल जाधव यांनी सहभाग घेतला.
वृक्षारोपण कार्यक्रम मुख्याध्यापक एस. जे. जानकर, अधीक्षक, अध्यक्षिका, शिक्षक व विद्यार्थ्यांच्या उपस्थितीत पार पडला. विद्यार्थ्यांमध्ये वाचनाची आवड निर्माण करण्यासोबतच पर्यावरण संवर्धनाचा संदेश देणारा हा उपक्रम कौतुकास्पद असल्याचे मत मुख्याध्यापक जानकर यांनी व्यक्त केले.
या सामाजिक उपक्रमाबद्दल गोदरेज कंपनीचे कर्मचारी व त्यांच्या कुटुंबीयांचे शाळा प्रशासनाने आभार मानले.
