सारथी महाराष्ट्राचा न्यूज | शहादा | प्रतिनिधी
महाराष्ट्र शासनाच्या महसूल विभागामार्फत नागरिकांना विविध महसुली सेवा, शासनाच्या लोककल्याणकारी योजनांचा लाभ तसेच महसुली विषयक प्रकरणांचे तात्काळ, पारदर्शक व प्रभावी निराकरण करण्याच्या उद्देशाने “छत्रपती शिवाजी महाराज महसूल अभियान” अंतर्गत महसूल समाधान शिबिराचे आयोजन बुधवार, दि. २२ जुलै २०२६ रोजी मीरा प्रताप लॉन्स, शहादा बायपास रोड, ता. शहादा, जि. नंदुरबार येथे करण्यात आले आहे.
या अभियानाचा उद्घाटन सोहळा सकाळी १० ते दुपारी १ वाजेपर्यंत, तर महसूल समाधान शिबिर सकाळी १० ते सायंकाळी ६ वाजेपर्यंत चालणार आहे.
या कार्यक्रमाच्या अध्यक्षस्थानी आमदार राजेशजी पाडवी हे राहणार असून, जिल्हाधिकारी डॉ. मित्ताली सेठी यांच्या मार्गदर्शनाखाली कार्यक्रम पार पडणार आहे. विशेष मार्गदर्शक म्हणून उपविभागीय अधिकारी दीपक गिरासे उपस्थित राहतील. तसेच तहसीलदार दीपक धिवरे (तळोदा) व संभाजी पाटील (शहादा) यांच्यासह महसूल विभागाचे विविध अधिकारी व कर्मचारी उपस्थित राहणार आहेत.
या शिबिरामध्ये शहादा-तळोदा विधानसभा मतदारसंघातील नागरिक, शेतकरी, महिला, युवक, ज्येष्ठ नागरिक तसेच सर्व पात्र लाभार्थ्यांना महसूल विभागामार्फत विविध सेवा, दाखले, अर्ज, महसुली प्रकरणांचे मार्गदर्शन व निकाली काढण्याची सुविधा एकाच ठिकाणी उपलब्ध करून दिली जाणार आहे.
“लोकाभिमुख प्रशासन – जनतेच्या सेवेसाठी तत्पर प्रशासन” या संकल्पनेनुसार आयोजित करण्यात आलेल्या या विशेष अभियानाचा लाभ घेण्यासाठी नागरिकांनी आवश्यक कागदपत्रांसह मोठ्या संख्येने उपस्थित राहावे, असे आवाहन आमदार राजेशजी पाडवी तसेच उपविभागीय अधिकारी दीपक गिरासे यांनी संयुक्तपणे केले आहे. अशी माहिती तहसीलदार संभाजी पाटील यांनी दिली आहे.
